Հայաստանի ժողովրդական արտիստ, սիրված դերասան Ազատ Գասպարյանի մտերիմ ընկեր, գեղանկարիչ Հաղթանակ Շահումյանը (Հաղթո) ընկերոջ մասին անցյալով չի կարողանում խոսել:
Նրա խոսքով՝ Ազատ Գասպարյանը բացի աստվածատուր տաղանդից, բացի տաղանդավոր դերասան լինելուց ու կերտած հրաշալի կերպարներից, մեծ մարդ էր, մեծ քաղաքացի՝ մարդկային որակումներով, հրաշալի հայ, նվիրված ընտանիքին. «Ազատը արև ու լույս էր, որ այսուհետ կպակասի բոլորիս: Նրա կորստի ցավը ոչ միայն ընկերներինը և մտերիմներինն է, այլ ազգային կորուստ է»,- ասաց Հաղթանակ Շահումյանը:
Ազատ Գասպարյանի մոտ երկու ամիս առաջ է ախտորոշվել ողնաշարի քաղցկեղ: Սակայն լավատես էր և մինչև վերջին օրը աշխատել է:
Ժողովրդական արտիստը պատրաստվում էր օգոստոսի 13-ին իր 70-ամյակը նշել: Մշակույթի նախարարությունը նախապատրաստում էր միջոցառում, իսկ ընկերներով էլ ամեն տարվա պես իր տարեդարձը ընտանեկան խնջույքի էր վերածելու: Ցավոք, չհասցրեց:
Թեև ի սկզբանե Ազատ Գասպարյանը իր հիվանդության մասին իմացել է, սակայն սկզբում այդքան լուրջ չէր պատկերացնում, բայց լավատեսորեն էր տրամադրված:
«Իր ընկերներից, բարեկամներից աջակցություն էին հայտնել Եվրոպա տեղափոխելու, ցավոք, չստացվեց, դեռ որոշում չէր կայացրել՝ մեկնի, թե ոչ: Հիվանդ ժամանակ շատ կայուն էր, ոգեշնչում էր մեզ»,- ասաց Հաղթանակ Շահումյանը:
Ազատ Գասպարյանը ունի երկու դուստր և չորս թոռ:
Ժողովրդական արտիստը մինչև վերջին օրը ստեղծագործել է, գրել բանաստեղծություններ. «Նա ազատ ժամանակ չունեցավ՝ վայելելու իր վաստակի պտուղները»,- ասաց ընկերը:
