Լուրեր
ԵՄ-Հայաստան բանակցություններում անորոշություն է. պետք է սպասել ԵՏՄ-ի սահմանած «կարմիր գծեր»-ին. «Դիսկուրս»

Տեսնում ենք, որ մեզ մոտ շատ արագ կառավարություններ են փոխվում, և այս փոփոխությունները կարծես թե արդյունք չեն տալիս. անդրադառնալով այս դիտարկմանը և հարցին, թե արդյոք սա հետևանքը չէ 2013թ. սեպտեմբերի 3-ի որոշման, երբ որոշվեց, որ Հայաստանի տնտեսությունն ամբողջապես պետք է կապվի Ռուսաստանի և ԵՏՄ-ի հետ, «Առաջին լրատվական»- ի հետ զրույցում իրենց դիտարկումները ներկայացրին ԱԺ ՀՀԿ խմբակցության պատգամավոր Գագիկ Մինասյանը և «Ժառանգություն» խմբակցության պատգամավոր Թևան Պողոսյանը:

Գագիկ Մինասյանը նշեց, որ Արևելյան գործընկերության այն երկրներում, որոնք ընտրել են ոչ թե ԵՏՄ, այլ ԵՄ ուղին, տնտեսական առումով խնդիրները պակաս չեն, իսկ ոչ տնտեսական խնդիրները ավելի խորքային ու ավելի անդառնալի են: «Մենք կրում ենք Ռուսաստանի տնտեսության հետ կապված խնդիրների արդյունքները, որը կկրեինք անկախ ԵՏՄ անդամակցությունից, այնպես որ այդ իրողությունները ոչ թե ԵՏՄ անդամակցությամբ են պայմանավորված, այլ հիմնականում գլոբալ զարգացումներով: Գ. Մինասյանի դիտարկմամաբ՝ ԵՏՄ անդամակցությունը տվել է որոշակի արտոնություններից օգտվելու հնարավորություններ»:

Թևան Պողոսյանի դիտարկմամբ՝ մեր տնտեսության այս վիճակը պայմանավորված է առաջին հերթին նրանով, որ միշտ ունեցել ենք ոչ օպտիմալ կառավարում, եթե անգամ տնտեսական աճ ենք ունեցել: «Եթե ի սկզանե վարեինք այնպիսի քաղաքականություն, որ մեր շուկան պատրաստ լիներ տարբեր հարվածների, ապա շատ խնդիրներ չէին ծագի: Ասոցացման համաձայնագրով որակական նոր տնտեսական հարաբերություններ կձևավորվեին, որի արդյունքում կարող էինք  մրցունակ լինել համաշխարհային մակարդակում: Իսկ այսօրվա դրությամբ ամենամեծ խնդիրն անորոշությունն է. ԵՏՄ-ն չգիտի, թե ուր է գնում, և դա Հայաստանին դնում է այն իրավիճակում, որ չի կարողանում այլ երկրների հետ համագործակցել»: Թ. Պողոսյանի խոսքով ՝ պետք է սպասենք, թե երբ պետք է ձևավորվեն ԵՏՄ-ի սահմանած «կարմիր գծերը», որից հետո փորձենք գնալ այլ երկրների հետ համագործակցության շուրջ բանակցելու:

 

Մանրամասները՝ տեսանյութում:

  • Դիտումներ՝ *