Ադրբեջանական APA լրատվական գործակալության փոխանցմամբ՝ Ադրբեջանի նախագահ Իլհամ Ալիևը Ստամբուլում 23-րդ Համաշխարհային էներգետիկ կոնգրեսի բացման ժամանակ ունեցած ելույթում հայտարարել է, որ Թուրքիան ու Ադրբեջանն իրականացնում են համատեղ էներգետիկ նախագծեր:
Ալիևի խոսքով՝ 100 տարի առաջ Բաքվում արդյունահանվել է առաջին նավթը. «Աշխարհում ծովային հանքավայրից նավթն արդյունահանվել է հենց Ադրբեջանում՝ Կասպիցում»:
Խոսելով «Դարի պայմանագրի» մասին՝ Ալիևը հայտարարել է, որ այս տարի նշվելու է Ադրբեջանի անկախության 25-ամյակը. «Էներգետիկ նախագծերը կարևոր դեր են խաղացել Ադրբեջանի անկախության վերականգնման գործում:
Ներկա դրությամբ գոյություն ունի ադրբեջանական նավթը համաշխարհային շուկա հասցնելու երեք երթուղի: Դրանցից երկուսը դուրս են գալիս դեպի Սև ծով (նկատի է առնվում Բաքու-Նովոռոսիյսկ և Բաքու-Սուփսա (Վրաստան) նավթամուղները-1in.am):
Մեկ նավթամուղ էլ՝ Բաքու-Թբիլիսի-Ջեյհանը, դուրս է գալիս Միջերկրական ծով: Մենք առաջինը Կասպից ծովը կապեցինք Միջերկրական ծովին: Ադրբեջանի գազի ապացուցված պաշարները կազմում են 2.6 տրիլիոն խորանարդ մետր: Նմանատիպ խոշոր ծավալի գազ փոխադրելու համար անհրաժեշտ է միջանցքի կառուցում: Ադրբեջանն ու Թուրքիան դարձան այդ ոլորտի առաջատարները և սկսեցին իրագործել TANAP գազատարի նախագիծը:
Հարավային գազային միջանցքի նախագիծը, որի մեջ մտնում է TANAP գազատարը, կազմում է 45 միլիարդ դոլար: Ադրբեջանն ու Թուրքիան Հարավային գազային միջանցքն իրագործելիս ցուցադրում են առաջնորդի որակներ»,- հայտարարել է Ալիևը:
