Քրդական Fırat լրատվական գործակալության փոխանցմամբ՝ Մարդու իրավունքների միության (IHD) Դիարբեքիրի մասնաճյուղի պատրաստած զեկույցի համաձայն` 2010 թվականին և 2011 թվականի առաջին 4 ամիսներին (16 ամսում) Թուրքիայում ձերբակալվել է 638 երեխա, որոնցից կալանվել է 211-ը:
Ընդ որում, 2010 թվականին Թուրքիայում ձերբակալվել է 286 երեխա, որոնցից կալանվել է 95-ը, իսկ 2011 թվականի առաջին 4 ամիսներին ձերբակալվել է 352 երեխա, կալանվել՝ 116-ը:
Հատկանշական է, որ նրանց մեծ մասը մեղադրվել է ահաբեկչական կազմակերպության (PKK) անդամ հանդիսանալու կամ ահաբեկչական կազմակերպության օգտին քարոզչություն իրականացնելու մեջ և դատապարտվել «քար նետող երեխաների» մասին (ահաբեկչական) օրենքով:
Հիշեցնենք, որ Թուրքիայի արդարադատության նախարարության տվյալներով, 2006 թվականից ի վեր Թուրքիայում «Ահաբեկչության օրենքի» շրջանակներում ձերբակալվել է 12-18 տարեկան 4,000 քուրդ երեխա (այդ թվում` նաև աղջիկներ):
Ի դեպ, շատ դեպքերում ձերբակալված քուրդ երեխաների դատավճիռն առավել խիստ է ստացվում, քան, ասենք, քուրդ զինյալինը: Դրանով թուրքական իշխանությունները փորձում են քուրդ երեխաներին հեռու պահել իրենց դեմ պայքարին մասնակցելուց, սակայն ոչինչ չի ստացվում:
