Գերմանական DPA լրատվական գործակալության փոխանցմամբ՝ ԱԷՄԳ գլխավոր տնօրեն Յուկիա Ամանոն հայտարարել է, որ Սիրիայի և Ուկրաինայի հարցերում Մոսկվայի ու Վաշինգտոնի միջև հարաբերությունների բարդացումը չի ազդում իրանական միջուկային ծրագրի վերաբերյալ ստորագրված Համատեղ համապարփակ գործողությունների պլանի իրագործման վրա:
Ամանոն ընդունել է, որ այդ ամենի հետ մեկտեղ Իրանի միջուկային ծրագրի վերաբերյալ ստորագրված համաձայնագիրը շարունակում է մնալ որպես բավական փխրուն: Իր գերմանական այցից առաջ Ամանոն հայտարարել է, որ սա առաջին դեպքը չէ, որ ԱՄՆ-ի ու Ռուսաստանի հարաբերություններում գրանցվում են վերելքներ ու անկումներ:
Ամանոն նկատել է, որ Իրանի վերաբերյալ համաձայնագրի իրագործումը փխրուն է մնում այն պատճառով, որ այս տարվա նոյեմբերի 8-ին ԱՄՆ-ում անցկացվելու են նախագահական ընտրություններ, իսկ Իրանում նախագահական ընտրությունները նշանակված են 2017 թվականի մայիսին:
