Բրազիլիայի Ռիո դե Ժանեյրո քաղաքի Կոպակաբանա առափնյա տարածքի լողափին ավելի քան 400 հազար մարդ մասնակցել է Կաթոլիկ երիտասարդության համաշխարհային օրվա բացման միջոցառմանը: Ինչպես հաղորդում է ITAR-TASS-ը, չնայած տրանսպորտի խնդիրներին և վատ եղանակին՝ տոնակատարությանը մասնակցել են մեծ թվով մարդիկ:
Երեկ երեկոյան Ռիո դե Ժանեյրոյի մետրոյի երկու գծերը կանգնել են ուժային մալուխի խափանման պատճառով, ինչի հետևանքով մետրոյի կայարաններում հսկայական հերթեր են գոյացել: Սոցիալական ցանցերում բուռն քննադատության են ենթարկվել քաղաքային իշխանությունները և մետրոյի ղեկավարությունը: Տասնյակ հազարավոր մարդիկ, որոնք ցանկացել են մասնակցել տոնակատարությանը, ստիպված են եղել այնտեղ հասնելու այլ միջոցներ գտնել:
Ջերմաստիճանը լողափին, որտեղ Երիտասարդության համաշխարհային օրվա կապակցությամբ կառուցել են հսկայական զոհասեղան, նույնիսկ ցերեկը չի բարձրացել 18 աստիճանից: Արևադարձային Ռիո դե Ժանեյրոյի բնակիչների համար դա «անտանելի ցուրտ է»:
Այսօր Հռոմի պապ Ֆրանցիսկոսը կժամանի Սան Պաուլու նահանգ, որտեղ Ապարեսիդա Աստվածամոր տաճարում պատարագ կմատուցի: