ԱՄՆ պետքարտուղար Ջոն Քերին շնորհավորել է հայ ժողովրդին Հայաստանի անկախության 25-ամյակի կապակցությամբ՝ փոխանցելով շնորհավորանքներ ԱՄՆ նախագահ Բարաք Օբամայի և ամերիկացի ժողովրդի անունից։ Ուղերձը տեղ է գտել Պետդեպի կայքում։
«ԱՄՆ-ը խորապես գնահատում է Հայաստանի և Ձեր բոլորի հետ իր ջերմ բարեկամությունը: Վերջին քառորդ դարում Հայաստանը մեծ առաջընթացի է հասել, և իմ երկրի կառավարությունը պատրաստ է շարունակել սերտորեն աշխատել Ձեզ հետ՝ աջակցելու բարգավաճման, ժողովրդավարական հաստատությունների, օրենքի գերակայության ու տարածաշրջանային խաղաղության ամրապնդման ընդհանուր նպատակներին:
Մենք գնահատում ենք Հայաստանի հետևողական օժանդակությունը միջազգային խաղաղապահ գործողությունների արդյունավետության ապահովման գործում և սիրիացի փախստականներին առնչվող ճգնաժամին արձագանքելու հարցում ունեցած առաջատար դերակատարումը: Մենք նաև երախտապարտ ենք ԱՄՆ-ում կենսունակ ու մեծ ձեռքբերումների հասած ամերիկահայ համայնքին։
Այս գեղեցիկ տոնի առթիվ լավագույն մաղթանքներս եմ հղում հայ ժողովրդին, ցանկանում խաղաղություն ու բարգավաճում»,- գրել է Ջոն Քերին:
