Մեդվեդևն ինքնուրույն սկսեց վարել մամուլի ասուլիսն իր հովանավորությամբ ստեղծված Սկոլկովո գիտատեխնիկական կենտրոնում, որտեղ են կենտրոնացվելու ՏՏ ոլորտի ընկերություններ, նոր համալսարաններ և դպրոցներ:
Մեդվեդևը հենց առաջին հարցին, որը վերաբերում էր արդիականացմանը, պատասխանել է, թե Սկոլկովոն պետք է շարունակություն ունենա, և անհրաժեշտություն չկա նոր նախաձեռնությունների և արդիականացման նոր փուլերի: Այն ամենը, ինչ սկսվել է այս ոլորտում, ըստ նախագահի, պետք է իր ավարտին հասցվի:
Հարցին, թե ինչու Մեդվեդևը հստակություն չի մտցնում հաջորդ նախագահական ընտրություններում իր առաջադրվելու կամ դրանից հրաժարվելու խնդրում, նա պատասխանել է, թե քաղաքական կյանքը միայն շոու չէ, և ընդհանրապես շոու չէ: Նրա կարծիքով, անհրաժեշտ է որոշակի տեխնոլոգիաների հետևել, որպեսզի հնարավոր լինի հասնել առաջադրված խնդիրներին: «Մենք գործնական քաղաքականությամբ ենք զբաղվում, որպեսզի ոչ թե տաքուկ տեղերում հայտնվենք, այլ հաջողության հասնենք»: Նա հատուկ շեշտել է, որ հայտարարությունը կարվի ճիշտ տեղում ճիշտ ժամանակին:
Այն հարցին, թե արդյոք պատրաստվո՞ւմ է պաշտոնանկ անել կառավարությունը՝ ինչպես դա սովորաբար արվում է Ռուսաստանում ընտրություններից առաջ, Մեդվեդևը պատասխանել է, որ այդպիսի լիազորություններ ինքը ունի և դրանցից չի հրաժարվել. «Այնպես որ, այսպես է…»,- ասել է նա:
