ԱՄՆ նախագահի դեմոկրատ թեկնածու Հիլարի Քլինթոնը Նևադա նահանգի Ռինո քաղաքում ելույթ է ունեցել ընդդեմ իր մրցակից Դոնալդ Թրամփի: Այս մասին հայտնում է The Washington Post-ը:
Ելույթի ընթացքում Քլինթոնը Թրամփին մեղադրել է Կրեմլի ձեռքերը արձակելու մեջ և Պուտինին անվանել «ծայրահեղ ազգայնականության կնքահայր»:
Իր կողմնակիցների առջև ելույթ ունենալիս Քլինթոնը հայտարարել է Թրամփի, Բրիտանիայի Անկախության կուսակցության նախկին ղեկավար Նայջել Ֆարաջի և Ռուսաստանի նախագահ Վլադիմիր Պուտինի գաղափարախոսական ընդհանրության մասին:
«Նա (Թրամփը) շարունակում է նսեմացնել ՆԱՏՕ-ի մեր դաշնակիցներին՝ ճանաչելով Ղրիմի ռուսական բռնակցումը և արձակելով Կրեմլի ձեռքերը Արևելյան Եվրոպայում: Այդ գլոբալ ապրանքանիշի, այդ ծայրահեղ ազգայնականության Մեծ կնքահայրը Ռուսաստանի նախագահ Վլադիմիր Պուտինն է»,- հայտարարել է Քլինթոնը:
Նա նշել է, որ Թրամփը «Պուտինին գովասանքներով է ողողում և խթանում ռուսամետ քաղաքականությունը»:
