Կրծոսկրով միացած սիամական երկվորյակներ Նավրասն ու Մոազը Սիրիայում մահացել են՝ սպասելով արտերկիր մեկնելու թույլտվության, որտեղ կարող էին նրանց առանձնացնել։ Այս մասին հայտնում է BBC-ն։
Երեխաները, որոնք միասին կշռում էին 5.4 կգ, ծնվել էին մեկ ամիս առաջ կառավարական ուժերի կողմից պաշարված Դումա քաղաքում։ Այնտեղից նրանց օգոստոսի 12-ին տարհանել ու տեղափոխել էին մանկական հիվանդանոց։
Նրանք մահացել են, մինչ կպատրաստվեին փաստաթղթեր արտերկիր ուղարկման համար՝ հայտնել է Սիրիա-ամերիկյան բժշկական միությունը։
Սիրիական ընդդիմության կայքը հրապարակել է այդ բարեգործական կազմակերպության ներկայացուցիչ Մուհամադ Կատուբի հայտարարությունը, որը տեղի ունեցածի համար մեղադրել է Դամասկոսին։ Նրա խոսքով՝ ԱԳՆ-ն մեղավոր է ելքի թույլտվությունը բավարար արագ չտրամադրելու համար։
Անցած շաբաթ նա մտավախություն էր հայտնել Սիրիայի իշխանությունների կողմից հնարավոր ձգձգումների առնչությամբ, քանի որ երեխաներին բուժման ընդունելու առաջարկները ստացվել էին ԱՄՆ-ից և Սաուդյան Արաբիայից։ Երկու երկրներն աջակցում են ուժերին, որոնք դիմակայում են Սիրիայի նախագահ Բաշար Ասադին։
