Թուրքիայում ադրբեջանցի հանցավոր հեղինակություն Ռովշան Լենքորանսկու (Ջանիև) սպանությունից հետո ձերբակալվել են նրա ձեռքի տակ եղած 3 վարձու մարդասպանները՝ Հաջի Բեյլագանսկին, Զաուր Սումգաիթսկին և Վահիդ Բակինսկին: Այս մասին հայտնում է Haqqin.az-ը:
Բեյլագանսկին կասկածվում է մեկ այլ օրենքով գող Գոջա Բակինսկու (Ալիբալա Ալիսաֆտար օղլու Համիդով) սպանության մեջ: Իրազեկ աղբյուրների տեղեկությամբ՝ Բեյլագանսկին եղել է Լենքորանսկու անձնական վարձու մարդասպանը, և հենց նրա հրամանով է 2013 թ. օգոստոսի 18-ին Ստամբուլում սպանել Գոջա Բակինսկուն:
Բակինսկու սպանությունից անմիջապես հետո «օրենքով գողերի» խումբը երդվել է վրեժ լուծել նրա մահվան համար:
Սպանված հեղիակության շրջապատին մոտ աղբյուրների հաղորդմամբ՝ 3 վարձու մարդասպան ներկա է եղել Ստամբուլում Բեշիքթաշ հյուրանոցում հաշվեհարդարի նախօրեին իր բրիգադի անդամների հետ Ռովշան Լենքորանսկու հանդիպմանը:
Այդ հանդիպումից անմիջապես հետո մի խումբ անհայտ անձինք Լենքորանսկու ավտոմեքենայի վրա կրակ են բացել ավտոմատներից:
Հարձակման ընթացքում ծանր վնասվածքներ ստացած Ջանիևը մահացել է Florence Nightingale կլինիկայում: Նրա վարորդը ևս մահացել է:
