Գիտնականները կարողացել են հստակ չափել շարժման ժամանակ մարդու մարմնի կողմից մշակվող էներգիայի քանակը: Պարզվել է, որ օրինակ՝ մատիտով գրելու ժամանակ արտադրվում է 10-15 միկրովատտ էներգիա, զբոսանքի ժամանակ՝ 150, իսկ վազքի ժամանակ՝ 800: Այդ տվյալները կօգնեն արագացնել «Առարկաների համացանցի» (Internet of things) և մարմնին կրվող և մարտկոցների կարիք չունեցող էլեկտրոնիկայի դարաշրջանի գալուստը: Այս մասին հայտնում է Technology Review-ը:
«Առարկաների համացանցը» գերցանցի կոնցեպցիա է, որը միավորում է ինչպես վիրտուալ, այնպես էլ իրական առարկաները: Այն իրականություն դարձնելու համար յուրաքանչյուր առարկա պետք է հատուկ ցուցիչներ ունենա: Սակայն ցանկացած սարքի համար անհրաժեշտ է էներգիա: Գիտնականները դրա աղբյուրը գտել են մարդու շարժումներում: Մի օր իրականություն կդառնա այն, երբ սուպերմարկետի յուրաքանչյուր արտադրանք ցանցում կկարողանա ցույց տալ իր արժեքը, պիտանելիության ժամկետը և այլն: Սմարթֆոնը սառնարանին մոտեցնելով՝ օգտատերը կարող է իմանալ, թե ինչպիսի մթերքներ կան այնտեղ: Այդ ամենը զգալիորեն կփոխի մարդու առօրյա կյանքը:
Ինժեներներն արդեն աշխատում են էներգիայի կիրառման ալգորիթմների վրա: