Սերգեյ Մանվելյանը, ով հավաքում է մեր մշակույթի մեծերի մասին հուշեր, շուրջ մեկ տարի է, ինչ զբաղվում է երգչուհի Լուսինե Զաքարյանի թողած մշակութային ժառանգությունն ի մի բերելով: Նա այսօր լրագրողների հետ հանդիպմանն ասաց, որ Լոսինե Զաքարյանի արվեստի հանդեպ ուշադրությունը մեր օրերում շատ քիչ է: Անցյալ տարի լրացավ նրա ծննդյան 75 և մահվան 20 տարին, սակայն Մշակույթի նախարարությունը ոչ մի միջոցառում չձեռնարկեց. «Ցավում եմ, որ ոչ միայն Մշակույթի նախարարությունը, այլև Էջմիածինն է մոռացել Լուսինե Զաքարյանին: Նրա ապրած տան պատերը խոնավությունից փլվում են, տնից կորել են արժեքավոր իրեր, լուսանկարները խոնավությունից ծռմռվել են»:
Բանախոսն ասաց նաև, որ այսօր հոգևոր երաժշտությունը վատ վիճակում է, չկան նվիրյալներ, միայն Աննա Մայիլյանն է, որ դրանով մինչ օրս զբավում է: Նրա խորին համոզմամբ` այսօր Մշակույթի նախարարությունը ոչ թե պետք է անտերության մատնի Լուսինե Զաքարյանի տունը, այլ այն վերածի թանգարանի և հոգևոր երաժշտության օջախի:
Սերգեյ Մանվելյանը հավելեց, որ չնայած Լուսինե Զաքարյանը հայտնի է որպես հոգևոր երգերի կատարող, սակայն երգել է նաև ջազ և ռուսական ռոմանսներ:
Ս. Մանվելյանը մեր մեծերի մասին արդեն հավաքել է 100-ից ավելի հուշ և մտադիր է այդ ամենը գրքի ձևով մատուցել հանրությանը:
