Կյուսյու համալսարանից ճապոնացի մասնագետները հայտնաբերել են, որ շաքարախտով հիվանդների մոտ տարիների ընթացքում նկատվում է գլխուղեղի այն մասի կրճատում, որը կապված է հիշողության հետ: Ինչպես ասված է Asahi պարբերականում` այդպիսով գիտնականները որոշել են գործոնը, որն անմիջական կապ ունի դեմենցիայի (ձեռքբերովի թուլամտություն) հետ:
Հետազոտությունների ընթացքում պարզվել է, որ այն մարդկանց մոտ, որոնք շաքարախտով հիվանդ են եղել 10 տարի, գլխուղեղի նշված տեղամասը 3%-ով ավելի փոքր է եղել, քան առողջների մոտ: Այդ տարբերությունը ավելի շոշափելի է եղել (6%) 15 տարի շաքարախտով տառապողների մոտ: Ինչպես նշել են բժիշկները, այդ պրոցեսները յուրահատուկ է դեմենցիայի զարգացման ժամանակ:
«Շաքարախտը սովորաբար հանգեցնում է արյունատար անոթների վնասումների: Դրանք դառնում են ավելի փխրուն, և մարդու մոտ առաջ է գալիս նյարդաբանական հիվանդություն, երիկամների հետ խնդիրներ: Միաժամանակ, հիվանդի ուղեղում դիտվում են փոփոխություններ, որը հանգեցնում է ձեռքբերովի թուլամտության»,- նշել են գիտնականները:
