Կահիրեի թեմական ժողովի ատենադպիր Սուրեն Բայրամյանն «Առաջին լրատվական»-ի հետ զրույցում անդրադարձավ Եգիպտոսում այս օրերին ծավալվող իրադարձություններին, կատարվող հեղաշրջմանը: Նրա խոսքով՝ թեև Եգիպտոսում հեղափոխություն տեղի ունեցավ, Սահմանադրության վավերացվեց, բայց ընտրյալ նախագահը վերջին մեկ տարվա ընթացքում խորքային իմաստով չիրականացրեց այն խոստումները, որ տվել էր ժողովրդին: Նրա իշխանության նպատակն էր բոլոր հաստատություններում պետական և հանրային ներկայություն հաստատել, ինչը ընդվզման ալիք առաջացրեց ժողովրդի մոտ, և արդեն «Մուսուլման եղբայրների» պաշտոնավարման ավարտին այդ ալիքը մեծացավ: Արդյունքնում՝ առաջացավ տիրող անհանդուրժողականությունը, որն անհնար եղավ լուծել փոխըմբռնման արդյունքում, և բանակը ստիպված եղավ միջամտել: Ընդդիմադիր հոսանքները հարմար գտան հեռացնել կամ չեզոքացնել նախագահին ու իր շրջապատը:
Մուհամմադ Մուրսիի կողմնակիցները չեն հաշտվում ստեղծված իրավիճակի հետ, նրանք ոտքի են կանգել՝ ազատելու նախագահին և վերադարձնելու նրան իր պաշտոնին, ինչին բանակն ընդդիմացել է: Մեր զրուցակցի խոսքով՝ այս պահին կա 42 զոհ, կան նաև վիրավոր ոստիկաններ:
Հայկական համայնքը, միութենական ազգային կառույցները աշխատում են զերծ մնալ այս ամենից. «Փառք Աստծո, որևէ հակահամայնքային տրամադրություններ չկան: Մենք էլ, իբրև պատասխանատուներ, թե՛ միութենական, թե՛ ազգային կառույցների մեջ ջանում ենք զուսպ գտնվել և ինքնամփոփ պայմաններում գործել»:
Եգիպտոսում, ըստ նրա, գոյություն չունի ժողովրդավարություն հասկացություն, դժբախտաբար, ամեն մեկը իր խոսքն ու կշռին է ուզում պարտադրել:
«Սա զինվորական հեղաշրջում չէ, ժողովրդական ընդվզում է, ժողովրդական շարժում՝ տիրող բարքերի դեմ»,- ասաց Սուրեն Բայրամյանը:
Նա նշեց, որ այժմ ոստիկանությունը ժողովրդի կողքին է, բայց ով բռնություն կիրառի, նրան պետք է պատժեն: Ժողովուրդը զանգվածաբար գոհ է, բայց տիրող իշխանավորների և ծայրահեղական կրոնամոլ հատվածը ուզում է վրիժառու արարքներ գործել, քանի որ սաստիկ վարկաբեկված են և չեն ընդունում, որ նոր ընտրություններ լինեն, քանզի այդ դեպքում նրանք ամեն ինչ կկորցնեն:
