«Առաջին լրատվական»-ի զրուցակիցն է «ԳԱԼԱ» հեռուստաընկերության տնօրեն Վահան Խաչատրյանը:
– Պարոն Խաչատրյան, ի՞նչ հիմքով է արդարադատության նախարարությունը մերժել ԳԱԼԱ կուսակցության պետական գրանցումը:
– Հիմքերը հարկ է, որ ճշտեք արդարադատության նախարարությունից, մեզ համար դրանք անհիմն են, մենք փաստաթղթային որևէ թերություն թույլ չենք տվել, դրանց վրա աշխատել են լուրջ մասնագետներ, և փաթեթը կազմվել է օրենքի տառին համապատասխան:
– ԳԱԼԱ-ն հայտարարել էր, որ առաջիկայում Գյումրիում սպասվող ՏԻՄ ընտրություններին մասնակցություն է ունենալու: Այս դեպքում ի՞նչ քայլեր եք ձեռնարկելու, արդյո՞ք ժամկետների առումով չեք ուշանա:
– Թույլ տվեք այն քայլերը, որոնք մենք ձեռնարկելու ենք, առայժմ չհրապարակել: Մենք հաշվի առել էինք նաև այս տարբերակը, որ կուսակցությունը գրանցելիս լինելու էին արհեստական խոչընդոտներ, ուստի, ավելի վաղ մշակել էինք ՏԻՄ ընտրություններին մասնակցելու հնարավոր այլ տարբերակներ:
Մենք մշակել ենք տարբերակներ նաև այն հնարավոր դեպքի համար, եթե փորձեն կուսակցությունը չգրանցել մինչև խորհրդարանական ընտրությունները:
– Մի քանի կուսակցություններ ձեզ այդ ընտրություններին աջակցելու հայտ էին ներկայացրել: Եթե չհասցնեք գրանցվել, ի՞նչ պետք է անեք, ի՞նչ մասնակցություն կունենաք այդ ընտրություններին:
– Արդեն պատասխանեցի Ձեր այդ հարցին:
– Դուք քաղաքական պատվեր եք համարում գրանցման մերժումը: Հնարավո՞ր է՝ ընտրություններից առաջ փորձում են այլընտրանքը չեզոքացնել:
– Այո, այս պահի դրությամբ լրջագույն մի շարք ուսումնասիրություններ ցույց են տալիս, որ իշխանությունը պետք է զիջի երկրորդ քաղաքը մեզ, ուստի աննախադեպ ռադիկալ քայլերի է գնում: Կուսակցությունը չգրանցելը ենթադրում է լուրջ զարգացումներ: Սա, այո՛, համարում ենք քաղաքական պատվեր: Ենթադրում ենք, որ աթոռը կորցնելու վախն է դրդում գնալ բիրտ մեթոդների, նրանց այլևս ժամանակ չի մնացել դեմոկրատ խաղալու: Գրանցման անհիմն արգելումն ավտորիտար վարչակարգի գործունեության դասական օրինակ է:
Ամեն դեպքում, իշխանությունների այս գործելաոճը մեզ չի շեղելու մեր նախանշած ուղուց և նպատակից, և մենք հետագա մեր քայլերը ոչ թե ծրագրում ենք համապատասխան նախարարության գրանցել-չգրանցելու փաստը հաշվի առնելով, այլ մեր համակիրների, քաղաքի, հանրապետության քաղաքացիների շահերից ելնելով:
