ԿԺԴՀ-ն ԱՄՆ-ից պահանջել է անմիջապես լուծարել Հարավային Կորեայում գործող «ՄԱԿ-ի հրամանատարությունը»: Կենտրոնական կորեական տեղեկատվական գործակալությունը նշում է, որ գործելով 1950-53թթ. կորեական պատերազմի շրջանում սկիզբ առած ռազմական մեխանիզմի «անվան տակ»՝ ԱՄՆ-ը իր ռազմական դիրքերն է ամրապնդում Հարավային Կորեայում՝ «սպառնալիք ստեղծելով Ասիա-Խաղաղօվկիանոսյան տարածաշրջանի անվտանգությանն ու խաղաղությանը»:
Ըստ գործակալության՝ դրա վառ ապացույցն է ԱՄՆ-ի և Հարավային Կորեայի՝ արդեն «սովորական դարձած» զորավարժությունները, որի «ծավալները և դրան մասնակցող զորքերի թիվը մշտապես աճում են»:
ԿԺԴՀ-ում կարծում են, որ այդ հրամանատարությունը չլուծարելը «անախրոնիզմ է, խախտում է ՄԱԿ-ի հիմնական փաստաթղթերի բովանդակությունը, խոչընդոտում Փխենյանի և Սեուլի միջև խաղաղության պայմանագրի ստորագրմանը»: Ուստի «ԱՄՆ-ի այդ որոշումը ցույց կտա, թե որքանով է Վաշինգտոնը հետաքրքրված ԿԺԴՀ-ի հետ թշնամական հարաբերությունների դադարեցմամբ, ինչպես նաև տարածաշրջանում խաղաղությամբ»,- ընդգծել է գործակալությունը:
