Հայաստանի գլխավոր գանձապետ Ատոմ Ջանջուղազյանն այսօր Ազգային ժողովում ներկայացրեց կրթության և գիտության, մշակույթի, սպորտի և երիտասարդության, սփյուռքի նախարարությունների 2010 թվականի բյուջեի կատարողականը:
Համաձայն Ջանջուղազյանի տվյալների, 2010 թվականին պետական բյուջեով կրթության և գիտության նախարարությանը տրամադրվել է 21.8 միլիոն դրամ, որի կատարողականը կազմել է 92.29 տոկոս, հաշվետու տարում ԿԳՆ իրականացրել է 59 բյուջետային ծրագիր, կառավարության պահուստային ֆոնդից ԿԳ նախարարությանը տրամադրվել է նաև 102.7 միլիոն դրամ, որը կատարվել է 100 տոկոսով, 2009 թվականի համեմատ, 2010 թվականին ԿԳ բյուջետային ծախսերը աճել են 5.7 տոկոսով:
Անդրադառնալով սփյուռքի նախարարության 2010 թվականի բյուջեի կատարողականին՝ Ջանջուղազյանը տեղեկացրեց, որ 2010 թվականին տրամադրվել է 535.9 միլիոն դրամ, որի կատարողականը կազմել է 97.54 տոկոս: Նախարարությունը իրականցրել է 11 բյուջետային ծրագիր, կառավարության պահուստային ֆոնդից տրամադրվել է լրացուցիչ գումար՝ 34 միլիոն դրամ, որն օգտագործվել է մասամբ: 2009 թվականի համեմատ, 2010 թվականին սփյուռքի նախարարության բյուջետային ցուցանիշները աճել են 41.7 տոկոսով:
Մշակույթի նախարարությանը հաշվետու տարում տրամադրվել է 7 միլիարդ 921 միլիոն դրամ, կատարողականը կազմել է 90.82 տոկոս: Նախարարությունը իրականացրել է 45 ծրագիր, կառավարության պահուստային ֆոնդից տրամադրված 259.8 միլիոն դրամը օգտագործվել է 97.78 տոկոսով:
Սպորտի և երիտասարդության նախարարությանը 2010 թվականին պետական բյուջեով տրամադրվել է 4 միլիարդ 210 միլիոն դրամ, որը կատարվել է 99.47 տոկոսով: Նախարարությունը իրականացրել է 29 բյուջետային ծրագիր, կառավարության պահուստային ֆոնդից հատկացվել է 177 միլիոն դրամ, որը օգտագործվել է 98.67 տոկոսով:
Հեռուստատեսության և ռադիոյի ազգային հանձնաժողովին հաշվետու տարում տրամադրվել է 150.5 միլիոն դրամ, կատարողականը` 90.67 տոկոս: Հայաստանի հանրային հեռուստառադիոխորհրդին 2010 թվականին տրամադրվել է 3 միլիարդ 260 միլիոն դրամ, որը կատարվել է 99.96 տոկոսով:
Գիտության ոլորտին 2010 թվականին տրամադրվել է 8 միլիարդ 10 միլիոն դրամ, իսկ կատարողականը եղել է 99.9 տոկոս: