Ռուսաստանում չի կարող կրկնվել եգիպտական հեղափոխությունը, գրում է Forbes ամսագիրը:
Ինչպես նշվում է հոդվածում գրեթե ամեն անգամ, երբ ինչ որ մի երկրում ժողովրդական ապստամբությունը տապալում է ավտորիտար կառավարությանը, սկսվում են շահարկումներ «Ե՞րբ դա տեղի կունենա Ռուսաստանում» թեմայի շուրջ : Հոդվածագրի կարծիքով՝ Մոսկվայում քիչ հավանական են Կահիրեում տեղի ունեցածի նման իրադարձությունները:
Նախևառաջ Եգիպտոսի բնակչությունն աճում է աշխարհում ամենաարագ տեմպերից մեկով, ինչը հսկայական ճնշում է գործադրում երկրի տնտեսական և քաղաքական ինստիտուտների վրա: Ռուսաստանի բնակչությունը կայուն է:
Բացի այդ Եգիպտոսը բախվել է ծայրահեղ աղքատության խնդրի հետ: Ռուսաստանը դեռևս աշխատանք ունի անելու՝ աղքատության մակարդակն իջեցնելու համար, սակայն այդ խնդիրն այդքան սուր չէ, որքան Եգիպտոսում՝ նշում է հոդվածագիրը:
Եգիպտոսն ունի ավելի երիտասարդ բնակչություն, քան Ռուսաստանը:
«Ռուսների հետ համեմատած՝ շատ քիչ եգիպտացիներ են աշխատում»,- նշվում է հոդվածում:
Հոդվածի հեղինակը նշում է, որ տարիներ շարունակ ռուսների եկամուտներն աճել են, իսկ եգիպտացիների եկամուտները գտնվել են լճացած վիճակում: Բացի այդ, Եգիպտոսի կառավարությունը փող չունի, իսկ ռուսական իշխանությունները «լողանում են փողի մեջ»:
Եվ վերջապես՝ Ռուսաստանն ունի զարգացած և ուրբանիստական հասարակություն, իսկ Եգիպտոսն այդ ցուցանիշներով հետ է մնում Ռուսաստանից և Արևմուտքից ավելի քան 50 տարով, իսկ աղքատ և ագրարային հասարակությանն ավելի բարդ է վերահսկել՝ եզրափակում է հոդվածագիրը:.
