Եգիպտոսում այժմ արդեն իշխանությունից մեկուսացված նախագահ Մուհամմադ Մուրսին սխալ է թույլ տվել՝ իրեն չենթարկեցնելով անվտանգության և զինված ուժերը, երբ նախորդ տարի անցավ իր պաշտոնին: Այսպես է կարծում հայտնի իրանցի օրենսդիր Ալադին Բորուջերդին: Նրա մեկնաբանություններում ակնհայտ է Թեհրանի հիասթափությունը՝ Մուրսիի հեռացման հետ կապված:
««Մուսուլման եղբայրներ»-ի առաջին սխալն այն էր, որ նրանք կարծում էին, թե միայն իշխանությունից հեռացնելով Հոսնի Մուբարաքին՝ կկարողանան ավարտին հասցնել հեղափոխությունը»,-ասել է նա՝ հավելելով, որ Մուրսիին չի հաջողվել լուծել երկրում գլխավոր տնտեսական խնդիրները:
Ո՛չ զինվորականները, ո՛չ ոստիկանությունն օգնության չեն հասել Մուրսիին՝ այս շաբաթ տեղի ունեցած զանգվածային բողոքի ակցիաների ժամանակ: Հակառակը՝ բանակն ուլտիմատում ներկայացրեց նախագահին, իսկ չորեքշաբթի օրը հայտարարեց նրա անկման մասին, գրում է Mignews-ը:
