Եգիպտոսում ոստիկանությունը և բանակը փորձում են դադարեցնել իշխանությունից հեռացված նախագահ Մուհամմադ Մուրսիի կողմնակիցների բողոքի ակցիաները Կահիրեում և շրջափակել են նրանց հրապարակում:
Ինչպես հաղորդում է RIA Novosti-ն, Գիզայում Կահիրեի համալսարանի մոտ՝ Ալ-Նահդա հրապարակում, շարունակում են մնալ մի քանի հարյուր իսլամիստներ, որոնք գիշերն այդտեղ են անցկացրել: Ոստիկանությունը և բանակը տեղի բնակիչների օգնությամբ շրջափակում են ցուցարարներին բոլոր կողմերից, սակայն դեռևս հարձակում չեն գործում հրապարակի վրա: Անվտանգության ուժերը թողնում են հրապարակից հեռանալ նրանց, ովքեր ցանկանում են, սակայն ոչ ոք չի կարող վերադառնալ:
Մուրսիի կողմնակիցները բողոքում են, որ իրենք հայտնվել են տեղեկատվական շրջափակման մեջ. զինվորականները փակել են եգիպտացի իսլամիստների հեռուստաալիքները, այդ թվում՝ նրանց աջակցող «Ալ-Ջազիրա» հեռուստաալիքի գրասենյակը:
