Իշխանությունը ներիշխանական պառակտումներով փորձում է լուծել Սերժ Սարգսյանի ժառանգորդի հարցը: «Առաջին լրատվական»-ի հետ զրույցում այս մասին ասաց քաղաքական և ընտրական տեխնոլոգիաների փորձագետ, վերլուծաբան Արմեն Բադալյանը՝ խոսելով իշխանության ներսում ընթացող գործընթացների շուրջ:
Արմեն Բադալյանի խոսքով՝ ընտրական միջոցառումներից հետո երկրում ստեղծվել է մի իրավիճակ, երբ հասարակության և իշխանության միջև վերջնական տարանջատումը կարելի է իրականացված համարել: Ըստ նրա՝ հասարակությունն իշխանությունից միայն ապրանք է սպառում, որն այսօր իշխանության և հասարակության միջև միակ կապող կետն է:
«Հասարակության շրջանում մինչ այս ընտրական միջոցառումները հույս կար, որ երկրում ինչ-որ բան կփոխվի, ընտրություններից հետո այդ բոլոր հույսերը վերացան, իսկ եթե հաշվի առնենք նաև այն, որ հուլիսի 1-ից կթանկանա գազը, մի քանի օր անց կթանկանա էլեկտրաէներգիան, հասարակության համար էլ ավելի պարզ կդառնա ամեն ինչ՝ ոչ մի դրական բան տեղի չի ունենա, կլինի ավելի վատ, ուստի առկա է այն մտայնությունը, որ օր առաջ պետք է հեռանալ երկրից:
Մարդիկ հեռանում են, իսկ մյուսների մոտ սկսում է աշխատել արտագաղթողի հոգեբանությունը, այսինքն՝ մնալով երկրում՝ ցանկություն չունեն մասնակցելու որևէ գործընթացի: Հասարակության մոտ գոյություն ունի այնպիսի կարծրատիպ, որ այս երկիրն այլևս իրենը չէ, այլ իշխանությանը՝ Հանրապետականինը, օլիգարխներինը: Ցանկացած գործողություն՝ Գորիսում կրակոցներ, գազի թանկացում, կեղծված ընտրություններ, Գյումրիում կրակոցներ, Ռուսաստանի կողմից Ադրբեջանին զենքի վաճառք, հասարակությանը չի հետաքրքրում, այնինչ նորմալ երկրներում դա հասարակության դիմադրությանը կարժանանար»,- նման տեսակետ հայտնեց Արմեն Բադալյանը:
Նա նկատեց, որ հասարակության այս անտարբերության պայմաններում ընդդիմությունը երկրում չի կարող ուժեղ լինել: Արմեն Բադալյանի համոզմամբ՝ ընդդիմությունը կարող է գործել, երբ իր գործունեության համար հասարակությունից ստանում է համապատասխան ազդակներ, իսկ հասարակության շրջանում արտագաղթողի մտածելակերպը թույլ չի տալիս, որպեսզի ընդդիմությունը գործունեություն իրականացնի, որովհետև ընդդիմությունը չի կարող միայն կուսակցություններով ինչ-որ բան անել: Այս ընթացքում, ըստ նրա, իշխանության շրջանում են որոշակի գործընթացներ գնում:
«Սա Սերժ Սարգսյանի պաշտոնավարման վերջին ժամկետն է, և, բնականաբար, առաջ է գալիս նրա ժառանգորդի խնդիրը: Սերժ Սարգսյանը փետրվարի 18-ից հետո կամաց-կամաց թուլանում է, քանի որ Հայաստանում տնտեսական ռեսուրսներն են թուլանում, և, բնականաբար, Հանրապետական կուսակցության մեջ եղած տարբեր խմբավորումների միջև պայքարը ընթանում է կուսակցությունում դիրքերն ամրապնդելու և այդ դիրքերով ինքնակառավարման համակարգում տնտեսական քչացող ռեսուրսներն իր ձեռքում կենտրոնացնելու, Սերժ Սարգսյանի ժառանգի հարցը լուծելու շուրջ: Այսօր իշխանությունը փորձում է լուծել և՛ ապագա իշխանության, և՛ քչացող ֆինանսական ռեսուրսների տիրապետման հարցը, որովհետև արտագաղթը միայն ընտրողներ չեն, հեռանում են նաև սպառողները, այսինքն՝ տնտեսության սպառումը սկսում է փոքրանալ»,- մեկնաբանեց Արմեն Բադալյանը:
Հարցին՝ հասարակությունը հեռանում է միայն իշխանության անգործությա՞ն արդյունքում, նա պատասխանեց, որ հասարակությունը հեռանում է ոչ միայն իշխանության գործելակերպից հոգնած լինելու, այլև տարբեր պատճառներով, որոնցից մեկը նաև ընդդիմության թուլությունն է:
«Հասարակությունն արտագաղթելով՝ պատասխանում է նաև ընդդիմությանը՝ ասելով, որ եթե նա չկարողացավ իշխանափոխություն իրականացնել, հույս չունի և հեռանում է: Հեռացողների մի որոշակի տոկոս հույս չի կապում ո՛չ իշխանության, ո՛չ ընդդիմության հետ»,- եզրափակեց Արմեն Բադալյանը՝ ասելով. «Հայաստան, Game over»:
Լուսանկարը՝ PanARMENIAN Photo-ի
