Ուրբաթ օրը Լիբիայի պետական հեռուստատեսությունը եթեր է հեռարձակել Լիբիայի առաջնորդ Մուամար Քադաֆիի հեռուստաելույթը, որտեղ բռնապետը, դիմելով իր դեմ ձևավորված կոալիցիայի անդամներին, հայտարարել է, որ ՆԱՏՕ-ն չի կարող գտնել իրեն, քանի որ նա լավ թաքնված է: Այս մասին հաղորդում է Reuters գործակալությունը:
«Հայտնում եմ վախկոտ խաչակիրներին, որ ես այնպիսի մի վայրում եմ, ուր դուք ինձ չեք կարող գտնել», ասել է Քադաֆին: «Ես ապրում եմ մի վայրում, ուր դուք ինձ չեք գտնի: Ես ապրում եմ միլիոնավոր մարդկանց սրտերում», ավելացրել է նա: «Տրիպոլիում իմ նստավայրի թշնամական ռմբակոծությունները, որոնք իրականացվել են նախօրեին, իսկական վախկոտություն է»,- նշել է նա:
Մինչդեռ Իտալիայի արտաքին գործերի նախարար Ֆրանկո Ֆրատինին երեկ հայտնել է լրագրողներին, որ Քադաֆին վիրավոր է, և հիմա հնարավոր է, որ լքել է Տրիպոլին: «Քադաֆին, ամենայն հավանականությամբ, վիրավոր է և գտնվում է Տրիպոլիից դուրս», ասել է Ֆրատինին լրագրողներին:
Այսօր նաև հայտնի է դարձել, որ երկուշաբթի օրը Հաագայում Միջազգային քրեական դատարանը Քադաֆիի ձերբակալության մասին որոշում կկայացնի: