Վրացական Apsny.ge կայքի փոխանցմամբ, հրապարակվել է Save the children («Պահպանել երեխաներին») միջազգային բարեգործական կազմակերպության վարկանիշային աղյուսակը, որում ընդգրկվել են 164 երկրներ: Դրանում Վրաստանը զբաղեցրել է 87-րդ տեղը:
Վարկանիշային աղյուսակը կազմվում է` հաշվի առնելով մի շարք չափանիշներ, այդ թվում նաև՝ բժշկական օգնություն, կրթություն, կենցաղային պայմաններ և այլն:
Կազմակերպության տվյալներով, մոր և մանկան համար լավագույն պայմանները ստեղծված են Նորվեգիայում, որն այս տարի փոխարինել է նախորդ տարվա առաջատար Շվեդիային:
Նորվեգիայում կանանց կյանքի միջին տևողությունը կազմում է 83 տարի, իսկ մինչև 5 տարեկան 33 երեխաներից մահանում է միայն մեկը: Ցանկում Նորվեգիային հաջորդում են Ավստրալիան, Իսլանդիան, Շվեդիան ու Դանիան:
Մոր և մանկան համար ամենավատ պայմանները ստեղծված են Աֆղանստանում, ուր կանանց կյանքի միջին տևողությունը կազմում է ընդամենը 45 տարի, իսկ ծննդաբերության ժամանակ 11 կանանցից մեկը մահանում է: Բացի այդ, մինչև 5 տարեկան 33 երեխաներից մահանում է 5-ը:
Save the children-ի ցանկում Վրաստանը տարածաշրջանում զբաղեցրել է երկրորդ տեղը` զիջելով Հայաստանին ու գերազանցելով Ադրբեջանին: Վրաստանում կանանց կյանքի միջին տևողությունը կազմում է 77 տարի, իսկ մինչև 5 տարեկան 34 երեխաներից մահանում է 1-ը: