ԱՄՆ-ում 67 տարեկանում մահացել է ամերիկացի հայտնի դերասան, արևելյան մարտարվեստի վարպետ Ջիմ Քելլին, որը նկարահանվել է 1970-ականների մարտաֆիլմերում՝ հայտնում է Associated Press գործակալությունը:
Աֆրոամերիկացի դերասանը մահացել է հունիսի 29-ին: Նրա նախկին կնոջ՝ Մերիլին Դիշմանի խոսքով՝ Քելլիի մահվան պատճառը քաղցկեղն էր:
Դերասանը կարատեով տարվել է համալսարանում ուսանելու տարիներին: Նա թողել է բուհը՝ մարտարվեստով զբաղվելու համար: 1971թ. նա միջին քաշային կարգում հաղթել է կարատեի աշխարհի առաջնությունում ու բացել սեփական մարզասրահը Կալիֆոռնիայում:
Ջիմ Քելլին 1973թ. նկարահանվել է «Վիշապի ելքը» մարտաֆիլմում, որտեղ նա խաղացել է Բրյուս Լիի հետ:
Իր կարիերայի ընթացքում Քելլին նկարահանվել է ավելի քան 20 մարտաֆիլմերում:
Նա իր դերասանական կարիերան ավարտել է 2009թ.:
