Մայիսի 12-ին Վիեննայում ԵԱՀԿ Մշտական խորհրդում Եվրոպական միությունը հայտարարություն է տարածել Հայաստանում տեղի ունեցած վերջին զարգացումների վերաբերյալ, որում ասվում է.
1. Եվրոպական Միությունը արձանագրում է Հայաստանում տեղի ունեցած վերջին դրական քաղաքական զարգացումները: Եվրոպական միությունը, մի շարք առիթներով, մտահոգություններ է հայտնել երկրում հավաքների ազատության առնչությամբ: Այդ կապակցությամբ, մենք ողջունում ենք այն փաստը, որ երկար տարիների ընթացքում առաջին անգամ քաղաքական ընդդիմությանը ապրիլի 28-ին թույլ տրվեց հանրահավաք անցկացնել Ազատության հրապարակում: Հուսով ենք, որ հանրահավաք անցկացնելու հետագա դիմումները կարժանանան նույն արձագանքին: Այս հանրահավաքի ընթացքում պահպանվեց կարգ ու կանոնը` ինչը, ըստ ամենայնի, արդյունք էր իրավապահ մարմինների և ընդդիմադիր խմբերի միջև արդյունավետ համագործակցության: Հաշվի առնելով, որ 2012 թ. Հայաստանում մեկնարկելու է նոր ընտրաշրջանը, հատկապես կարևորում ենք հավաքների ազատության հարգումը:
2. Եվրոպական միությունը նաև ողջունում է նախագահ Սարգսյանի ապրիլի 20-ի հայտարարությունը, որում կոչ է արվում ավելի մանրակրկիտ հետաքննություն անցկացնել 2008 թ. մարտյան բռնի դեպքերի առնչությամբ: Այդ նույն համատեքստում ողջունում ենք, որ վերջին շաբաթների ընթացքում այդ դեպքերից հետո դատապարտված և կալանավորված երեք ընդդիմադիր ակտիվիստներ` Հարություն Ուռուտյանը, Ռոման Մնացականյանը և Արամ Բարեղամյանը, վաղաժամ ազատ են արձակվել: Կոչ ենք անում Հայաստանի իշխանություններին շտապ ազատ արձակել մնացյալ բոլոր ակտիվիստներին: Եվրոպական Միությունը կարծում է, որ 2008 թ. մարտյան բռնի դեպքերի մանրակրկիտ հետաքննությունը և այդ դեպքերի առնչությամբ ձերբակալված բոլոր անձանց ազատ արձակումը կօգնեն Հայաստանի իրական առաջխաղացմանը:
3. Վերջապես, Եվրոպական Միությունը ցանկանում է ևս մեկ անգամ հաստատել կարևորությունը, որ տրվում է Հայաստանի հետ հարաբերությունների ակտիվացմանը, և հորդորում է Հայաստանի կառավարությանը լիարժեքորեն օգտվել Արևելյան գործընկերության ու Եվրոպական հարևանության քաղաքականության ընձեռած հնարավորություններից:
