Պակիստանում անհայտ անձը հարձակվել է 18-ամյա դերասանուհի Բուշրա Վաիզի վրա՝ նրա դեմքին լցնելով ծծմբական թթու: Դեպքը տեղի է ունեցել երկուշաբթի առավոտյան՝ Նովշեր քաղաքում: Տուժածը լուրջ վնասվածքներ է ստացել դեմքի աջ կողմին, ձեռքերին ու ոտքերին: Նրան կարող է սպառնալ մասնակի կուրություն: Այս մասին հայտնում է Daily Mail-ը:
Հարձակումը կատարվել է այն ժամանակ, երբ նա քնած է եղել, այդ իսկ պատճառով չի կարողացել դիմադրել: Վաիզի մայրն ու եղբայրը, որոնք աղմուկ էին լսել և վազել օգնության, թեթև վնասվածքներ են ստացել: Նրանք բոլորը հոսպիտալացվել են:
Հարձակման պատճառների մասին չի հաղորդվում: Դերասանուհու հարազատները վստահ են, որ դա նրա երկրպագուներից մեկի ձեռքի գործն է, որի ամուսնության առաջարկը նախկինում մերժվել է: Ոչ պաշտոնական վարկածով՝ Վաիզի վրա հարձակվել են ահաբեկիչները, որոնք դեմ են պակիստանցի կանանց արևմտամետ կենսակերպին:
Անցած տարի երկրում արձանագրվել է նմանօրինակ 150 դեպք:
