Կոտայքի մարզի Պռոշյան գյուղում ապրիլի 2-ին ՀՅԴ-ական գյուղապետ Հրաչ Մուրադյանի դաժան սպանությունից հետո գյուղապետի արտահերթ ընտրություններն անց են կացվելու հուլիսի 14-ին:
Շրջանառվող լուրերի համաձայն՝ պայքարը հիմնականում ընթանալու է Պռոշյան համայնքի ղեկավարի տեղակալ, ինքնառաջադրված ՀՅԴ անդամ Վովա Սահակյանի և 2012-ին Պռոշյանի համայնքի ղեկավարի ընտրություններում առաջադրված, ՀՀԿ անդամ Արթուր Մուրադյանի միջև: Մյուս թեկնածուներն են անկուսակցականներ՝ «ՀՀ Նախագծերի պետական արտագերատեսչական փորձաքննություն» ՓԲԸ-ի գլխավոր մասնագետ Ալեքսան Ալեքսանյանը, «ԴԵԼԻԿՏ» ՍՊԸ-ի տնօրեն Ցոլակ Գրիգորյանն ու Պռոշյանի գյուղապետարանի կրտսեր մասնագետ Գալուստ Մկրտչյանը:
«Բոլորին ճանաչում ենք, բոլորը մեր գյուղի բնակիչներ են, բոլորը լայն ընտրության հնարավորություն կունենան»,- «Առաջին լրատվական»-ի հետ զրույցում ասաց Վովա Սահակյանը:
Նա նշեց, որ ընտրություններում իր հաղթելու հնարավորությունները շատ մեծ է գնահատում: Վովա Սահակյանն իրեն հաղթող թեկնածու է համարում, քանի որ, ինչպես ինքն է ասում, գործով են արդեն ապացուցել. «Գալիս ենք նույն թիմով, որը երեք ընտրություններ է հաղթել, և գալիս ենք նույն պլատֆորմով, նույն ծրագրերով, որոնք ժողովուրդը տեսել է, և ինչը կունենա իր շարունակականությունը Մուրադյան Հրաչի եղերական մահից հետո»։ Նա նշեց, որ Հրաչ Մուրադյանը բոլորի գյուղապետն է եղել՝ և՛ իրեն ձայն տվողի, և՛ ձայն չտվողի:
Պատասխանելով այն հարցերին, թե Պռոշյան գյուղի 90 տոկոսը ՀՅԴ ադամնե՞ր են, արդյոք դա՞ է ձեզ հաղթելու հույս ներշնչում, Վովա Սահակյանը նկատեց, որ Պռոշյան գյուղն անկախ, ազատ մտածող մարդկանցով բնակեցված համայնք է, Պռոշյանն ազատամարտին հարյուրից ավելի մասնակցություն է ունեցել, տվել է Արցախի հերոս Պետոյին, տվել է Մուրադյան Հրաչին և մյուսներին. «Այստեղ ըմբոստ և ազատ մարդիկ են: Հրաչ Մուրադյանը եղել է ՀՅԴ ներկայացուցիչ, բայց նա եղել է ամբողջ գյուղի ղեկավարը, իր համար բոլոր պռոշյանցիները հավասար են, և այսօր էլ մեր աշխատակազմում երեք-չորս կուսակցականներ կան, մնացածը ազատ-անկախ մտածող մարդիկ են, բոլորն էլ տարբեր կուսակցություններ ներկայացնող»:
Այնուամենայնիվ, նա նշեց, որ ներքին լարվածություն կա, քանի որ եղերական սպանությամբ համայքնի ղեկավար է մահացել. «Իհարկե սպասում կա, իհարկե ոչ մեկը հանգիստ չէ, բոլորը սպասման մեջ են։ Նախաքննությունը գնում է, և մենք վստահ ենք, որ գործը կբացահայտվի, և մեղավորները կստանան արժանի պատիժը»:
