Թուրքական Anadolu լրատվական գործակալության փոխանցմամբ` Թուրքիայի ԱԳՆ-ը դատապարտել է Սիրիայի Հալեպ քաղաքի հիվանդանոցներին հասցված ավիահարվածները:
Թուրքիայի ԱԳՆ-ի հայտարարությունում ընդգծվում է. «Սիրիայում շարունակվում են Բաշար Ասադի վարչակարգի ռազմաօդային ուժերի ու Ռուսաստանի ավիացիայի կողմից անխղճաբար հիվանդանոցների, դպրոցների, մզկիթների ու բնակելի այլ կետերի վրա հարձակումները:
Մենք կտրականապես դատապարտում ենք երեկվանից Հալեպի հիվանդանոցների դեմ սկսված հարձակումները, ինչի հետևանքով զոհվել են տասնյակ խաղաղ մարդիկ: Ամբողջովին ավերվել է Հալեպի Շաեր թաղամասում գտնվող հիվանդանոցը:
Հալեպի հանդեպ ավիահարվածները մարդկության խայտառակությունն են: Անկասկած է, որ նմանատիպ հանցանքները չեն մնա անպատիժ: Մենք կոչ ենք անում արդարադատությանը հանձնել մարդկության դեմ հանցանքների համար մեղավորներին, և որ միջազգային հանրությունն անհապաղ միջամտի ստեղծված իրավիճակին ավիահարվածներին վերջ դնելու համար»:
