Մեծ Բրիտանիայի ռազմածովային ուժերն արգելել են իրենց նավաստիներին «կանանց ու սիրելիների» ավանդական կենացը խմել: Այդ մասին հաղորդել է Associated Press-ը՝ հղում կատարելով բրիտանական ռազմածովային ուժերի մամլո ծառայությանը:
Իր որոշումը հրամանատարությունը բացատրել է նրանով, որ ցանկանում է ցուցադրել «մշակութային փոփոխությունները», քանի որ վերջին 20 տարվա ընթացքում նավատորմում կտրուկ մեծացել է ծառայող կանանց թիվը:
Հունիսի 23-ից «կանանց և սիրելիների կենացը» (որին հաջորդում է «և թող նրանք երբեք չհանդիպեն» արտահայտությունը) ասելու փոխարեն, պետք է ասել «մեր ընտանիքների կենացը»:
Բացի այդ, նավատորմում սեռերի հավասարության ակցիայի շրջանակներում արգելվում է նաև «մեր տղամարդկանց կենացը» (to our men), որին փոխարինելու է «մեր նավաստիների կենացը»:
Բրիտանական նավատորմի բազմադարյան ավանդության համաձայն՝ շաբաթվա յուրաքանչյուր օր սեղանի շուրջ հնչեցվում է ավանդական յոթ կենացներից մեկը:
