Քրդական Fırat լրատվական գործակալության փոխանցմամբ, Թուրքիայի հարավ-արևելքում գտնվող Շըրնաք նահանգում պատգամավորության թեկնածու, քուրդ Հասիփ Քափլանը հայտարարել է, որ վարչապետ էրդողանը «պոռնո քաղաքականություն» է վարում.
«Կառավարությունն է պատասխանատու քաղաքական գործիչների անձնական կյանքին առնչվող սեռական բնույթի տեսագրությունների համար: Թուրքիայում «պոռնո քաղաքականությունը» ներդրել է ներկայիս վարչապետը: Վերջինս դա անում է իր իշխանության պահպանման և ամրագրման համար: Հենց էրդողանն էլ հանդիսանում է այդ սեռական պատմությունների գլխավոր դերակատարը»:
Հիշեցնենք, որ օրեր առաջ ինտերնետում հայտնվեցին «Ազգայնական շարժում» կուսակցության (ԱՇԿ) վերնախավի 4 ներկայացուցիչներին առնչվող սեռական բնույթի տեսագրություններ: Արդյունքում նրանք ստիպված եղան հրաժարական տալ և կասեցնել հունիսի 12-ին կայանալիք խորհրդարանական ընտրություններին իրենց մասնակցությունը:
Ընդ որում, ԱՇԿ-ն նրանցից երկուսի թեկնածությունն առաջադրել էր Ստամբուլում, իսկ մյուս երկուսինը` Ադանայում ու Քըրշեհիրում: Այդ պատճառով առաջիկա ընտրություններում թուրքական խորհրդարանում գոյատևման պայքար մղող ԱՇԿ-ի պատգամավորական թեկնածուների թիվը 550-ից նվազեց մինչև 546-ը: Այն կարող է էլի նվազել, եթե հաշվի առնենք, որ էրդողանի զինանոցում է գտնվում ևս 8 նմանատիպ տեսագրություն:
Հատկանշական է, որ մոտ մեկ տարի առաջ` մայիսի 10-ին, սեռական սկանդալի պատճառով ստիպված էր եղել հրաժարական տալ Թուրքիայի գլխավոր ընդդիմադիր ուժ հանդիսացող Ժողովրդա-հանրապետական կուսակցության (ԺՀԿ) նախագահ Դենիզ Բայքալը:
Դրանից օրեր առաջ թուրքական Vakit թերթի համացանցային տարբերակում հեռարձակվել էր Դենիզ Բայքալի և նույն կուսակցության անդամ, կին պատգամավոր Նեսրին Բայթոքի միջև սեռական հարաբերությունների տեսագրությունը, որը նկարահանվել էր թաքնված տեսախցիկով: Այն ժամանակ Բայքալը հայտարարել էր, որ այդպիսի դավադրությունն անհնար կլիներ առանց իշխանությունների ջանքերի: