Հյուսիսային Կորեայի առաջնորդի մորաքրոջ ամուսինը հայտարարել է, որ կարող է միջնորդի դեր խաղալ ԱՄՆ-ի և Հյուսիսային Կորեայի միջև՝ գրում է Washington Post-ը։
«Իմ վերջնական նպատակն է Հյուսիսային Կորեա վերադառնալը։ Ես հասկանում եմ Ամերիկան, և ես հասկանում եմ Հյուսիսային Կորեան, այնպես որ՝ ես կարող եմ միջնորդ դառնալ նրանց միջև բանակցություններում։ Եթե Կիմ Չեն Ինը դեռ այնպիսին է, ինչպիսին ես եմ նրան հիշում, ես կարող եմ հանդիպել նրա հետ և խոսել»,- ասել է Լի Կանը։
Կիմ Չեն Ինի մորաքույրը՝ Կո Յոն Սուկը, ով երկար ժամանակ խնամել է հյուսիսկորեացի առաջնորդին մանկության տարիներին, և նրա ամուսինը՝ Լի Կանը, 1990-ականների վերջից ապրում են ԱՄՆ-ում, որտեղ ուղևորվել էին ռեժիմի կողմից հետապնդումների մտավախությունների պատճառով։ Ի տարբերություն կնոջ՝ Լին հույս ունի կրկին լինել Փխենյանում։
