Ռուսական RBC-ի փոխանցմամբ, Վրաստանի նախագահ Միխեիլ Սաակաշվիլին միջնակարգ դպրոցների ուսուցիչների հետ հանդիպման ժամանակ հայտարարել է, որ Հայաստանը, Ղրղզստանը, Ուկրաինան և շատ այլ հետխորհրդային երկրներ ընդօրինակում են վրացական բարեփոխումները.
«Խոսքը մասնավորապես գնում է կրթական ոլորտի մասին: Ռուսաստանը մեզ հետևում է դռան դիտանցքից: Մենք բոլորս պետք է նոր չափորոշիչներ ստեղծենք վրացական կրթական համակարգում:
Իմ կրտսեր՝ հնգամյա որդին տիրապետում է մի շարք լեզուների: Չնայած դրան` նա նախընտրել է գնալ վրացական դպրոց, քանի որ ներկայումս այդ սերնդի ներկայացուցիչները Վրաստանում ստանում են հոլանդական մակարդակի կրթություն, եթե ոչ ավելի բարձր»:
Հիշեցնենք, որ գրեթե մեկ ամիս առաջ էլ Սաակաշվիլին հայտարարել էր, թե 2013 թվականին Վրաստանում անհնար կլինի տեսնել դպրոց, որ անբարեկարգ վիճակում կգտնվի. «Ավելին, 2013 թվականից սկսած` մեր դպրոցները կլինեն ավելի լավ վիճակում, քան Ամստերդամում ու Կոպենհագենում գործող դպրոցները»:
