«Ռուսալ-արմենալ» ալյումինի փայլաթիթեղ արտադրող գործարանի բանվորների՝ արդեն մեկուկես տարի իրենց իրավունքների համար մղվող պայքարը շարունակվում է: Նրանք պահանջում են վտանգավոր արտադրամասում աշխատելու համար հավելավճարներ, ինչը սակայն մեժվում է: Գործարանի շուրջ 105 բանվորների գործով դատարաններն իրարամերժ դատական ակտեր են կայացրել: «Լև գրուպ» իրավաբանական ընկերության տնօրեն Լևոն Բաղդասարյանը լրագրողների հետ հանդիպմանը նշեց, որ մեկուկես տարի առաջ է խնդիրը ծագել, Առաջին ատյանում, ըստ էության, բազմակողմանի քննվել է, օրենսդիրը սահմանել է թոշակավորում՝ ելնելով նյութերի վնասակարությունից, մինչդեռ Վերքննիչ քաղաքացիական դատարանը գտել է, որ ամսական հավելավճարները գործադիրը չպետք է վճարի: Իսկ Վճռաբեկ դատարանն էլ, Լևոն Բաղդասարյանի խոսքերով, ձեռքերը լվաց: Փաստաբանը նշեց, որ գործն ուղարկվելու է Մարդու իրավունքների Եվրոպական դատարան: Նա հավելեց, որ այս մեկուկես տարվա ընթացքում որևէ արհմիություն չփորձեց կանգնել աշխատակիցների կողքին:
«Խնդիրը հանրային խնդիր է, եթե այսօր նրանց հետ են այսպես վարվում, և պետական լիազոր մարմինն անտարբեր է, թքած ունի իր քաղաքացու վրա` վաղը յուրաքանչյուրիս հետ այդպես կվարվեն, ես չեմ ուզում ՀՀ քաղաքացին անհարմար վիճակի մեջ ընկնի»,- ասաց Լևոն Բաղդասարյանը:
Նա նշեց, որ գործարանի աշխատակիցները ստանում են 120-130 հազար դրամ, կարողանում են իրենց գոյությունը պաշտպանել, սակայն գոծարանում վախի մթնոլորտ է, անընդհատ սպառնում են աշխատակիցներին հեռացնել:
Նրա խոսքերով՝ մարդն իրեն բռնում է այն գիտակցության մեջ, որ պետությունը, իշխանությունն իրենց կողքին կանգնած չեն:
«Ես Եվրադատարանում այս գործը հաղթելու եմ, իմ ցանկությունն է, որ ՀՀ քաղաքացին իրեն մարդ զգա, իր արժանապատվությունը չոտնահարվի»,- ասաց նա: Հիմա գործատուն արդեն սպառնում է զանգվածային ազատումներ իրականացնել, աշխատակիցներն իրենք էլ չեն ուզում աշխատանք կորցնել, սակայն նրանց սպառանում են, թե աշխատում եք՝ աշխատեք, այլապես աֆրիկյան էժան աշխատուժ կբերեմ:
Հիմա նրանք դիմում են վարչապետին, որ նա հանձնարարի լսելու աշխատակիցների բողոքները, և մեղավորներին օրենքով սահմանված կարգով պատասխանատվության ենթարկեն:
