«Ժառանգության» փոխնախագահ, Երևանի ավագանու անդամ Արմեն Մարտիրոսյանն, «Առաջին լրատվական»-ի հետ զրույցում անդրադառնալով ԲՀԿ-ի հետ ավագանիում հնարավոր համագործակցությանն, ասաց, որ ցանկացած պարագայում՝ համագործակցության հետ կապված, իրենք որևէ խնդիր չունեն, եթե հարցերի շուրջ միատեսակ մոտեցումներ կան տվյալ քաղաքական ուժի հետ:
Խոսելով իրենց «Բարև Երևան» դաշինքի աշխատանքների մասին՝ Մարտիրոսյանն ասաց, որ իրենք արդեն «ամբողջ ծավալով» աշխատանքների մեջ են. «Այսօր արդեն կարևորագույն խնդիր քննարկվեց, և մենք մեր դիրքորոշումն արտահայտեցինք՝ քաղաքապետարանի ենթակայության տակ գտնող աշխատակիցների հաստիքացուցակների հետ կապված: Մենք կարծում ենք, որ ուռճացված է այդ հաստիքացուցակը, և կարելի է բավականին խնայողություններ անել, որոնք կուղղվեն Երևան քաղաքի բնակիչների տարբեր խնդիրների լուծմանը՝ և՛ կենցաղային, և՛ սոցիալական: Այն պարտականությունը, որ կա ընդդիմության վրա, մենք իրականացնում ենք»:
Հարցին, թե հնարավո՞ր է «Բարգավաճ Հայաստանի» հետ ընդհանուր ծրագրեր և մոտեցումներ մշակեն այս կամ այն հարցի շուրջ, Արմեն Մարտիրոսյանը պատասխանեց. «Հնարավոր է, որ այդպիսիք լինեն. իրենք ևս մտահոգություն ունեին այդ աշխատակիցների թվի հետ կապված, իրենք ձեռնպահ քվեարկեցին, մենք՝ դեմ, բայց իրենք ևս խնդիր տեսել էին։ Այնպես որ, տարբեր հարցերի շուրջ հնարավոր է համատեղ ինչ-որ ծրագրեր իրականացնենք»:
Մեր այն դիտարկմանը, թե այն բանից հետո, որ ավագանու ԲՀԿ-ական կազմը մասնակցեց Տարոն Մարգարյանի երդմնակալությանը, առաջին նիստին միաձայն կողմ քվեարկեց ամեն ինչին, Ա. Մարտիրոսյանը պատասխանեց. «Դա իրենց որոշելիքն է։ Չգիտեմ՝ ում համար է քննարկման առիթ դարձել, բայց ինձ համար քննարկման առիթ չի դարձել, որովհետև «Բարգավաճ Հայաստանի» ղեկավարը հստակ հայտարարել է, որ ընդդիմադիր քաղաքական ուժ չեն և չեն կարող լինել ընդդիմություն, ուստի իրենց դիրքորոշումը, կարծում եմ, շատ պարզ է, իսկ մենք ընդդիմություն ենք: Այն անձինք, ովքեր փորձում են անընդհատ ընդդիմադիր դաշտ բերել Բարգավաճին՝ դա իրենց խնդիրն է։ Ես հենվում եմ Գագիկ Ծառուկյանի ասածների վրա, և կարծում եմ, որ իրենք այն դիրքորաշումն են արտահայտում, որը յուրահատուկ է իրենց, և դա ոչ ընդդիմադիր քաղաքական ուժի պահվածք է»:
Միևնույն ժամանակ, մեր զրուցակիցը հավելեց, որ անկախ նրանից, որ ԲՀԿ-ն ընդդիմադիր չէ և չի կարող լինել՝ եթե խնդրի շուրջ ունենան միատեսակ մոտեցում, կարող են շատ հանգիստ համագործակցել: