Իրավապահները Բաթում քաղաքում ձերբակալել են 5 մարդու, որոնք կասկածվում են «գողական աշխարհին» պատկանելու մեջ, հաղորդում է «Նովոստի Գրուզիան»՝ հղում կատարելով Վրաստանի ՆԳՆ-ին:
«Հետաքննությունը պարզել է, որ ձերբակալվածները ճնշում են գործադրել մի գործարարի վրա՝ նպատակ ունենալով ստանալ, այսպես կոչված, «գողական մասնաբաժին»,- ասվում է ՆԳՆ-ի տարածած հաղորդագրության մեջ:
Գերատեսչությունում նշել են, որ բոլոր ձերբակալվածները նախկինում բազմիցս դատվել են ծանր հանցագործությունների համար:
Նշվում է, որ օպերատիվ-հետախուզական ու քննչական աշխատանքների արդյունքում ձերբակալվել են 1978թ. ծնված Իմեդա Ա.-ն, 1959թ. ծնված Իրակլի Կ.-ն, 1979թ. ծնված Ալեքսանդր Մ.-ն, 1974թ. ծնված Ռուսլան Չ.-ն, 1972թ. ծնված Լևան Կ.-ն:
Նրանք ձերբակալվել են միաժամանակ, Բաթումում: Հարուցվել է քրեական գործ Վրաստանի Քրեական օրենսգրքի 223-րդ հոդվածի համաձայն:
