Ճի՞շտ են լուրերը, որ Երևանի ավագանու առաջին նիստի ժամանակ Ձեր շնորհավորանքները Տարոն Մարգարյանին հետո ԲՀԿ-ում դարձել են քննարկման առարկա՝ «Հրապարակ»-ը հարցրել է Երևանի ավագանու ԲՀԿ ֆրակցիայի ղեկավար Թամարա Պողոսյանին: «Ոչ, ինչ Դուք ասում եք, ընդամենը ասեկոսեների մակարդակում է, մեր խմբակցությունը լավ գիտակցում է և էթիկետի սահմանը, և կուսակցության քաղաքական գիծը»:
ԲՀԿ ավագանիում կուսակցությունն ի՞նչ կեցվածք է դրսևորելու՝ ընդդիմադի՞ր, այլընտրանքայի՞ն, կառուցողակա՞ն: «Ես կարծում եմ, որ այսօրվա մեր կուսակցության բոլոր թևերի առջև դրված է պարոն Ծառուկյանի վերջին հայտարարությունը»: Որ ԲՀԿ-ն ընդդիմադի՞ր չէ: «Առավել ստույգ` կուսակցության կառուցողական պահվածքին առնչվող, և մեր ֆրակցիան ևս առաջնորդվելու է կուսակցության նախագահի արած պաշտոնական հայտարարությամբ»:
Մի անկեղծ հարց, տիկին Թամար. ԲՀԿ-ում «տակից» գործընթացները շատ-շատ ու խիստ բազմազան են, Դուք այդքան ներուժ ունե՞ք՝ դիմակայելու-դիմագրավելու այդ տիպի գործընթացները: «Գիտեք ինչ, գնահատականներ եք տալիս, որոնց հետ ես համաձայն չեմ սկզբունքորեն. վստահաբար կարող եմ ասել, որ կա կուռ կուսակցություն, որն ունի լուրջ գործառույթներ, դիրքորոշում քաղաքական դաշտում, ինչու ոչ` ունի նաև բազմաթիվ խնդիրներ, այո, լինում են նաև ներկուսակցական քննարկումներ, տարաձայնություններ, սակայն կտրականապես հերքում եմ Ձեր ասածները»: