Թուրքական Anadolu գործակալությունը հաղորդում է, որ վարչապետ էրդողանը շահել է թուրքական ընդդիմության առաջնորդ, Ժողովրդա-հանրապետական կուսակցության (ԺՀԿ) նախագահ Քեմալ Քըլըչդարօղլուի դեմ ներկայացված դատական հայցը: Վերջինս էրդողանին վճարելու է 7,000 թուրքական լիրա (ավելի քան 4,500 ամերիկյան դոլար):
Այսօր այդպիսի վճիռ է կայացրել Անկարայի 5-րդ քաղաքացիական դատարանը` համարելով, որ 2010 թվականի հոկտեմբերի 26-ին Թուրքիայի Ազգային մեծ ժողովում (ԹԱՄԺ) ունեցած ելույթում Քըլըչդարօղլուն անհիմն արտահայտություններ է գործածել էրդողանի հասցեին և խախտել նրա իրավունքները:
Ի դեպ, էրդողանն իր դատական հայցում Քըլըչդարօղլուից պահանջում էր 100,000 թուրքական լիրա (ավելի քան 65,000 ամերիկյան դոլար) փոխհատուցում:
Հիշեցնենք, որ ներկայումս ընթացքի մեջ է էրդողան-Քըլըչդարօղլու ևս մեկ դատական գործընթաց: Ապրիլի 24-ին Քըլըչդարօղլուն Սամսունում ու Բաթմանում հանդիպումներ էր ունեցել իր ընտրազանգվածի հետ և երկու դեպքում էլ սուր քննադատության էր ենթարկել Էրդողանին, ինչը, վերջինիս փաստաբանների կարծիքով, դուրս է եկել սովորական քննադատության շրջանակներից ու խախտել Էրդողանի իրավունքները:
Դրա համար դատական հայցեր ներկայացնելու մեծ սիրահար Էրդողանը Քըլըչդարօղլուից պահանջում է 40,000 թուրքական լիրա (ավելի քան 26,500 ամերիկյան դոլար)` յուրաքանչյուր ելույթի համար 20,000-ական թուրքական լիրա փոխհատուցում: