Ըստ «Հայպետհիդրոմետ» օդերևութաբանական ծառայության օդերևութաբան Զարուհի Պետրոսյանի` այս ամառը կլինի այնպիսին, ինչպիսին նախորդներն էին: Նա այսօր լրագրողների հետ հանդիպմանն ասաց, որ ամառն արդեն իսկ իր դերի մեջ է մտել՝ այսօր Արարատյան դաշտում գրանցվել է 35 աստիճան տաքություն: Հունիսին հանրապետության հյուսիսային կեսում սպասվում է չոր եղանակ, հարավային կեսում` հակառակը: Չոր եղանակը կշարունակվի նաև սեպտեմբեր ամսին, ամսական տեղումների քանակը կլինի նորմայից պակաս:
«Եթե այսպես շարունակվի, բոլոր տեսակետներից լավ ամառ կլինի: Ամենատաք ամիսները կլինեն հուլիսն ու օգոստոսը»,- տեղեկացրեց նա:
Բանախոսն ասաց, որ եղանակային տատանումները ամբողջությամբ կկարգավորվեն հունիսի վերջին, հունիսի 15-16-ին սպասվում է առանց տեղումների եղանակ, հունիսի 17-ին երեկոյան ժամերին հանրապետությունում սպասվում են տեղումներ, 18-ին տեղ-տեղ կլինեն անձրևներ, հնարավոր է նաև կարկուտ, իսկ հունիսի 19-ից եղանակը կսկսի կայունանալ:
