Կառավարության նիստից հետո, էկոնոմիկայի նախարար Արծվիկ Մինասյանը լրագրողների հետ զրույցում անդրադարձավ պատերազմական շրջանում տնտեսության վիճակին ու հարկային քաղաքականությանը: Ըստ նախարարի` հարկային մարմինը արդյունավետ է աշխատել հարկերի հավաքագրման մասով: Ապրիլ ամիսը նաև շահութահարկի գծով կանխավճարների վճարման ժամանակահատվածն է, այսինքն` մի քանի գործոնների զուգակցմամբ` հարկային քաղաքականությունը արդյունավետ է իրականացվել:
«Ադրբեջանական ագրեսիան, որի նպատակն էր, ի վերջո, նաև հարված հասցնել մեր տնտեսական իրողություններին, տնտեսական ակտիվությանը, լիովին ձախողվել է, և դրա ապացույցներից մեկն էլ հարկային քաղաքականության, զբոսաշրջության ոլորտում արձանագրված ցուցանիշներն են»,- ասաց Արծվիկ Մինասյանը:
Ինչ վերաբերում է հակամենաշնորհային քաղաքականությանը, նախարարի խոսքով` պետք է սկսել օրենսդրությունից, օրենսդրական վերանայումներից, որը մեկ-երկու ամսվա խնդիր չէ, այլ քաղաքականություն է, որը որդեգրվում է և սահմանադրական փոփոխություններով պայմանավորված՝ այդ աշխատանքներն իրականացվում են: Կան նաև միջնորդություններ, աշխատանքներ, որպեսզի ապահովի հավասար մրցակցային դաշտը՝ պայմանավորված ներկա օրենսդրությամբ:
Հարցին, թե այսօր Հայաստանի տնտեսությունը պատրա՞ստ է պատերազմին, նախարարը պատասխանեց. «Կարճ կասեմ`այո՛, պատրաստ է»:
Անդրադառնալով թուրքական ապրանքների արգելքի վերաբերյալ հարցին՝ նախարարը պատասխանեց. «Ոչ ոք չի խոսում թուրքական ապրանքների արգելքի մասին, խոսում ենք սահմանափակումների մեխանիզմների մասին»:
Մանրամասները՝ տեսանյութում: