Իրանի կանանց հասարակությունը հայտարարել է նախագահական ընտրապայքարում Հասան Ռուհանիին աջակցելու մասին: Այս մասին հայտնում է Aftab News-ը: Իրանի հանգուցյալ առաջնորդ իմամ Խոմեյնիի դուստրը՝ Զահրա Մոստաֆավին, Իրանի Իսլամական Հանրապետության Կանանց հասարակության գլխավոր քարտուղարն է:
«Հաշվի առնելով դոկտոր Հասան Ռուհանիի բարձր որակավորումը և նրա մեծ փորձը՝ բոլոր իրանցիներին կոչ ենք անում հունիսի 14-ին կայանալիք նախագահական ընտրություններում քվեարկել Ռուհանիի օգտին»,- ասվում է հասարակության պաշտոնական հայտարարության մեջ:
Հասարակության գործունեության նպատակն է իրական իսլամական մշակույթի ներդրումը, ճնշվածների իրավունքների պաշտպանությունը, կայսերական մշակույթի, ռասիզմի և սիոնիզմի դեմ պայքարը, ինչպես նաև կանանց իրավունքների և գիտական, մտավոր և մշակութային հնարավորությունների ընդլանումը:
Նշենք, որ նախագահի ռեֆորմիստ թեկնածուներից մեկը՝ Մուհամմադ Ռեզա Արեֆը, երեկ երեկոյան հօգուտ Ռուհանիի հանել էր իր թեկնածությունը:
