Միջազգային հանրությունը պետք է հետաքննի տեղեկությունն այն մասին, որ Վենեսուելայի ընդդիմությունն ԱՄՆ-ից 18 մարտական ինքնաթիռ է գնել և տեղավորել դրանք Կոլումբիայում գտնվող ամերիկյան ռազմաբազայում՝ հայտարարել է Վենեսուելայի նախագահ Նիկոլաս Մադուրոն:
Ավելի վաղ Վենեսուելայի նախկին փոխնախագահ, ներկայում հայրենիքում հայտնի լրագրող Խոսե Վինսենտե Ռանխելը ելույթ է ունեցել հեռուստաեթերում՝ ընդդիմության գործունեության հերթական բացահայտմամբ, համաձայն որի՝ ընդդիմությունը համաձայնագիր է կնքելԱՄՆ ինքնաթիռաշինական արդյունաբերության ղեկավարության հետ՝ 18 մարտական ինքնաթիռների մատակարարման վերաբերյալ: Նրա փոխանցմամբ՝ համաձայնագիրը կնքվել է մայիսի 27-ին, Տեխասի Սան Անտոնիո քաղաքում: Այս մասին հայտնում է ITAR-TASS-ը:
Ռանխելի տեղեկություններով՝ գնված օդանավերը կգործարկվեն Վենեսուելայի վրա հաձակման համար:
Հայտարարությունն անարձագանք չեն թողել Կոլումբիայի իշխանությունները, որոնք ավանդաբար պնդում են, որ իրենց երկրի տարածքում օտարերկրյա ռազմաբազաներ չկան: Կոլումբիայի փոխնախագահ Անխելինո Գարսոնի կարծիքով՝ լավագույն բանը, որ կարելի է անել ստեղծված իրավիճակում՝ օդանավերի գնման վերաբերյալ տեղեկության ստուգման խնդրանքով ՄԱԿ-ին դիմելն է:
Մադուրոն համաձայնություն է հայտնել կոլումբիացի փոխնախագահի հետ և հայտնել, որ այդ պատմությունը պետք է հետաքննել՝ լինի ՄԱԿ-ում թե երկկողմ հանձնաժողովի շրջանակում: Մադուրոն առաջարկում է հետաքննությանը ներգրավել նաև հարավամերիկյան ազգերի միությանը:
Ընդդիմադիր Էնրիկե Կապրիլեսը հերքել է մեղադրանքները՝ անվանելով դրանք «կատակ», որը կարող է փչացած երևակայության պտուղ լինել:
