«Իշխանությունն ու ընդդիմությունը իրենց երկխոսության մեջ մի առավելություն ունեն` նրանք խոսում են այն հարցերի շուրջ, որ ցանկանում են՝ առանց հաշվի առնելու ռեալ քաղաքական օրակարգը, որը կա երկրում»,- անդրադառնալով քաղաքական երկխոսության ստեղծած իրավիճակին՝ «Առաջին լրատվական»-ի հետ զրույցում կարծիք հայտնեց վերլուծաբան Անուշ Սեդրակյանը:
Սեդրակյանի խոսքերով, ցավալի է, որ այդ երկխոսության պարագայում հանրային հրապարակայնացումից դուրս են մնում երկրի հիմնական խնդիրները` սոցիալական իրավիճակի օր օրի վատթարացումը, մարդու իրավունքների շուրջ կատարվող ծածկադմփոցը և Ղարաբաղի խնդիրը, որը հնչեցվող վերջին պահանջների ֆոնին մի տեսակ խամրել է և չի երևում:
Ըստ վերլուծաբանի՝ իշխանություն-ընդդիմություն երկխոսությունը միակողմանի է ընթանում. «Ինձ համար ակնհայտ է մի բան՝ երկխոսության մի մասն ընթանում է Ազատության հրապարակում, իսկ իշխանությունների պատասխանը որևէ ձևով չի հնչեցվում, և այդ առումով սա ինձ համար միակողմանի երկխոսություն է»:
Անուշ Սեդրակյանը նկատեց, որ իշխանությունն ու ընդդիմությունը կարող են որոշակի խնդիրների շուրջ բանակցել, բայց նախ այդ բոլոր խնդիրները պետք է հրապարակային քննարկման ներկայացվեն. «Բացի դրանից, այդ երկխոսության մեջ պետք է հստակեցվեն հիմնարար թեզերը, որովհետև այն երեք թեզը, որ հնչեցվեցին վերջերս, միայն իշխանության և ընդդիմության օրակարգ չեն, և պետք չէ դա դուրս հանել հանրային օրակարգից»:
Խոսելով երկխոսության արդյունքում քաղաքական դաշտում ուժերի հնարավոր վերադասավորումներից՝ Սեդրակյանը նշեց, որ այդ ամենը կախված է նրանից, թե երկխոսության կողմերը ինչպես կներկայացնեն արդյունքները. «Եթե այս բոլոր պահանջների իրագործման մեջ իշխանությունը կարողանա իրեն վերագրել բարեգործի դերը, ապա միայն ինքը կթելադրի ուժերի հետագա վերադասավորումը, իսկ եթե ընդդիմությունը կարողանա ճշգրիտ և պարզ ներկայացնել հանրությանը, թե որքանով է ինքը կարողացել հաջողության հասնել այդ պահանջների իրականացման գործում, ապա այս պարագայում, իհարկե, ընդդիմությունն ավելի ակտիվորեն կմասնակցի քաղաքական դաշտի հետագա վերաձևավորումներին»:
Ըստ Սեդրակյանի՝ այս ամենի արդյունքում էլ կուրվագծվեն խորհրդարանական ընտրությունների արդյունքները, և այն խճանկարը, որը մենք կունենանք խորհրդարանում:
