Բրիտանական խորհրդարանն իրավունք կստանա քվեարկություն անցկացնել սիրիական ընդդիմությանն ամեն անգամ զենք մատակարարելու առնչությամբ: Այդ մասին հաղորդել է BBC-ն՝ հղում կատարելով Մեծ Բրիտանիայի ԱԳՆ ղեկավար Ուիլյամ Հեյգին:
Նրա խոսքերով՝ քանի որ մինչ այդ ոչ մի կանոնակարգ չէր հաստատվել նման իրավիճակի համար, քվեարկությունն այսպես, թե այնպես լինելու է: «Ես ոչ մի պատճառ չեմ տեսնում, թե ինչու այդպես չի կարող լինել մինչև որևէ որոշման ընդունումը»,- նշել է Հեյգը:
Նախարարն ասել է, որ Մեծ Բրիտանիան «մեծ դժկամությամբ» է ուղարկելու զենքը, բայց իրականությունն այնպիսին է, որ տասնյակ հազարավոր մարդիկ սպանվել են և սիրիական կառավարության դեմ հանդես եկող ուժերը միջոցներ չունեն սեփական պաշտպանության համար:
«Ավելի մեծ ճնշում է հարկավոր Ասադի վարչակարգի վրա, որպեսզի քաղաքական որոշում կայացվի, և ընդդիմությունը պետք է մասնակցի Սիրիայի վերաբերյալ բանակցություններին»,- վստահ է Հեյգը:
