Վրացական Apsny.ge կայքի փոխանցմամբ, համայն աշխարհի չերքեզական կազմակերպությունները շարունակում են դիմել Վրաստանի խորհրդարանին` խնդրելով ճանաչել 1763-1864 թվականների կովկասյան պատերազմների ընթացքում Ռուսաստանի կողմից իրագործված չերքեզ ժողովրդի ցեղասպանությունը:
Արդեն այդպիսի խնդրանքներ ստացվել են Իսրայելից ու Գերմանիայից, ինչպես նաև Կաբարդինա-Բալկարիայից:
Չերքեզները նշում են, որ ավելի քան 100 տարի տևած ռուս-չերքեզական պատերազմի և Ռուսական կայսրության ծավալման դեմ չեքեզական դիմակայության հետևանքով Կովկասի ամենաբազմամարդ ժողովուրդներից մեկը կորցրել է իր բնիկ հայրենիքը` Չերքեզիան, ինչի արդյունքում չերքեզները ցրվել են աշխարհի ավելի քան 50 երկրներում, իսկ հայրենի տարածքները՝ դատարկվել բնիկներից։
Ներկայումս Կովկասում բնակվում է համայն աշխարհի չերքեզների մոտ 1/10-ը: Ավելին, նրանք իրենց հերթին արհեստականորեն բաժանված են տարածքային և վարչական սկզբունքներով. միևնույն ժողովուրդը բաժանված է Կաբարդինա-Բալկարիայի, Կարաչայ-Չերկեսիայի և Աղըդեայի միջև՝ կրելով նույնիսկ տարբեր «պաշտոնական» անվանումներ։ Նշենք նաև, որ 1763-1864 թվականների կովկասյան պատերազմների, ինչպես նաև ՍՍՀՄ գոյության առաջին տասնամյակներում ստալինյան տեռորի ընթացքում կովկասյան գրեթե բոլոր ժողովուրդները կրել են մեծաքանակ մարդկային կորուստներ, իսկ մի քանի ազգություններ ու համաշխարհային իմաստով բացառիկ լեզուներ՝ իսպառ վերացել։