Շուրջ մեկ ամիս է, ինչ ազատամարտիկները հավաքվում են Ազատության հրապարակում՝ բողոքելով իրենց հանդեպ անտարբերությունից և ոչ արժանապատիվ կենսաթոշակից: Այդ ընթացքում նրանք արդեն մի քանի անգամ բողոքի ակցիաներ են անցկացրել Կառավարության շենքի առջև, գրավոր ներկայացրել իրենց պահանջները:
Այսօր վերջապես վարչապետ Տիգրան Սարգսյանն ընդունել է ազատամարտիկներին, քննարկել նրանց հուզող հարցերը: Ինչպես «Առաջին լրատվական»-ի հետ զրույցում ասաց ազատամարտիկ, «Հետախույզ վետերանների միություն» ՀԿ-ի անդամ Արթուր Բունիաթյանը, Տիգրան Սարգսյանի հետ հանդիպել է հինգ մարդուց կազմված խումբը: Հանդիպման ժամանակ ևս մեկ անգամ ներկայացվել է ազատամարտիկների դիրքորոշումը մի շարք հարցերի շուրջ, փոխանցվել է գրավոր նամակ:
«Վարչապետը մեկ ամիս ժամանակ է խնդրել՝ քննարկելու համար մեր ներկայացրած հարցերը, սակայն այդ ընթացքում հավաքները չեն դադարելու. մեկ-երկու օրվա հանգստից հետո նորից կհավաքվենք Ազատության հրապարակում»:
Արթուր Բունիաթյանը նշեց, որ քաղաքապետարանից թույլտվություն են ստանալու՝ հունիսի 16-ին ազատամարտիկների արտոնված հանրահավաք անցկացնելու համար: Ազատամարտիկները մշտապես կապի մեջ են մարզերի ազատամարտիկների հետ, և պրն Բունիաթյանի փոխանցմամբ՝ եթե իրենց խնդիրները լուծում չստանան, հրապարակում կհավաքվեն ավելի մեծ թվով ազատամարտիկներ:
«Երբ համբերության բաժակը լցվում է, այլևս ոչ սոցիալական վիճակը, ոչ տարիքը չեն կարող ազատամարտիկներին հետ պահել՝ միտինգներին մասնակցելու համար: Հիմա ովքեր Երևանում են, մոտ են ապրում, նրանք են հավաքվում՝ մինչև տեսնենք, թե ինչ կլինի»:
Պրն Բունիաթյանն ասաց, որ կառավարությունը մի փոքր աչալուրջ պիտի լինի և հարցի լուծումը ականջի հետև չգցի. «Գիտենք, որ աշխատատար գործընթաց է, սակայն կա մեկ խնդիր ևս՝ ազատամարտիկների մեջ պետք է զտումներ անել: Չգիտես որտեղից՝ անհայտ ազատամարտիկներ են գալիս, երևի ասֆալտի ֆիդայիներն են, մենք էլ չենք տեսել կռվելիս»,- եզրափակեց մեր զրուցակիցը:
