Սիրիայի հարցով բանակցային գործընթացը չպետք է ներառի միայն պաշտոնական Դամասկոսին և ընդդիմության «ռիյադական» խմբին, պետք է ներկայացված լինեն Սիրիայում ապրող բոլոր ազգությունները: TASS-ին այսպիսի կարծիք է հայտնել ՌԴ-ում Սիրիական Քրդստանի ներկայացուցչության ղեկավար Ռոդի Օսմանը:
«Մենք կարծում ենք, որ բանակցային գործընթացը չպետք է լինի միայն երկկողմանի՝ պաշտոնական Դամասկոսի և Էր-Ռիյադում կազմավորված ընդդիմության խմբի միջև: Բանակցություններին պետք է մասնակցեն Սիրիայում ապրող բոլոր ազգերի ներկայացուցիչները, նրանք պետք է քննարկեն սոցիալական և քաղաքական միության ստեղծման հարցն այնպես, որ ոչ մի ժողովրդի իրավունքները չխախտվեն»,- ասել է նա:
Մեկնաբանելով ԶԼՄ-ներում հայտնված տեղեկությունը, որ Սիրիայի հարցով ՄԱկ-ի հատուկ հանձնակատար Ստաֆան դե Միստուրան կողմ է բանակցային գործընթացին քրդերի ընդգրկվելուն՝ Ռոդի Օսմանը հիշեցրել է, որ «պրն դե Միստուրան նախկինում ևս ասել է, որ քրդերը պետք է մասնակցեն Ժնևում բանակցային գործընթացին»:
