«Մենք տակավին չենք տեսնում, որ Հայաստանում լուրջ բարեփոխումների համար կա քաղաքական կամք: Թող ոչ ոք հույս չունենա, թե մենք կողջունենք Ազատության հրապարակում հանրահավաք անցկացնելու խնդրի լուծումը, քանի որ, ինչպես տեսանք, այն տրամադրվում է ուժերին, որոնք կոռեկտ հավաքներ են իրականացնում»,- խոսելով իրավապահ համակարգում փոփոխություններ կատարելու՝ իշխանությունների ցանկության մասին՝ այսօրվա ասուլիսին հայտարարեց ԱԺ «Ժառանգություն» խմբակցության պատգամավոր Ստեփան Սաֆարյանը և հավելեց, որ իշխանությունների կողմից փոփոխություններ կատարելու մասին խոստումները սին են ու փուչ:
Սաֆարյանի խոսքերով, «Ժառանգության» պատգամավորների, ինչպես նաև Զարուհի Փոստանջյանի եղբոր` Տիգրան Փոստանջյանի գործերով դատավարությունները ցույց են տալիս, որ Հայաստանում դեռևս կիրառվում է հեռախոսային արդարադատությունը, և դատական համակարգը բարեփոխելու իրական ցանկություն իշխանությունը բնավ չունի:
Սաֆարյանն ընդգծեց, որ այս իրավիճակից դուրս գալու միակ ելքը սահմանադրական հանրաքվեի նախաձեռնումն է, ինչը առաջարկել է «Ժառանգության» հիմնադիր Րաֆֆի Հովհաննիսյանը: Սաֆարյանն ընդգծեց, որ այդ բարեփոխումները պետք է արվեն նոր իշխանության օրոք. «Բայց չի լինում այնպես, որ մի օր արթնանանք ու տեսնենք նոր, լավ իշխանություն, այդ իսկ պատճառով անհրաժեշտ է լայն պարագծով կոնսենսուսի հասնել համակարգի փոփոխության համար»:
Նրա կուսակից Զարուհի Փոստանջյանն էլ նկատեց, որ պետք է ամրագրել հակակշիռների և զսպումների մեխանիզմ, որն այսօր խախտված է, և իշխանությունը կենտրոնացած է մեկ անձի` ՀՀ նախագահի ձեռքում:
