«Առնվազն 5 տարի է Ալիևը անընդհատ խոսում է բլից հաղթանակի և մեր ռազմավարական գործընկերոջից զենք գնելու մասին: Բնական է, որ սրան պատրաստ պիտի լինեինք. նրանք դա փորձելու էին: Այս մասին «Առաջին լրատվական»- ի հետ զրույցում ասաց «Հանրապետություն» կուսակցության առաջնորդ Արամ Զ. Սարգսյանը՝ անդրադառնալով վերջին օրերին ղարաբաղաադրբեջանական շփման գծում Ադրբեջանի նախաձեռնած սադրիչ գործողություններին:
«Վաշինգտոնը մշտապես կողմ է եղել սահմանների մշտադիտարկմանը, իսկ ում ձեռնտու չէր այդ մշտադիտարկումը, ովքեր էին դեմ: Ստատուս քվոյի պահպանումը ձեռնտու չէր Ադրբեջանին: Եվ այդ մասով պասիվ էր Ռուսաստանը, որովհետև հասկանում էր, որ մշտադիտարկման դեպքում իր ազդեցությունը փոքրանում է, և ավելանում է այն պետության ազդեցությունը, որը տեխնիկակական միջոցներ կտրամադրի մշտադիտարկման համար»,- նշեց Ա. Սարգսյանը:
Նրա դիտարկմամբ՝ այն հայտարարությունները, որոնք արվում են ռուսական կողմից, բացարձակ չեն համապատասխանում այն իրականությանը, ինչը ներկայացվում էր մեզ, որ մենք ԵՏՄ և ՀԱՊԿ անդամ ենք դարձել առաջին հերթին մեր անվտանգությունն ապահովելու համար: «Եվ այսօր այդ երկիրը հավասարության նշան է դնում, հստակ իմանալով, թե ով է նախահարձակ եղել»:
«Մենք պետք է հույսներս դնենք միայն մեզ վրա,- նշեց Արամ Սարգսյանը,- երբ հույսներս մեզ վրա ենք դրել, հաջողություններ ենք ունեցել՝ սկսած Սարդարապատի ճակատամարտից՝ վերջացրած Արցախյան ազատամարտով: Այն միտքը, որ մեծ եղբայր չլինի, մեզ կկոտորեն, միանշանակ միֆ է»:
Մանրամասները՝ տեսանյութում:
