Հայաստանի պետական պաշտոնյաները Մարտի 8-ի կապակցությամբ հերթ են կանգնել կանանց շնորհավորական ուղերձներ հղելու համար: Այդ հարցում Հայաստանի իշխանությունը շատ և խիստ պարտաճանաչ է, կամ շատ խիստ պարտաճանաչ է: Հայաստանի իշխանությունը բաց չի թողնում որևէ տոնական առիթ, որևէ օր, ժամ, որպեսզի շնորհավորական ուղերձ հղի հասարակությանը, տարբեր շերտերի, ոլորտների, տարբեր սեռերի ներկայացուցիչների, շնորհավորի, մաղթի, ցանկանա և այլն: Հայաստանի իշխանությունն այդ տեսանկյունից իրեն պահում է ամբողջատիրական որևէ համակարգին բնորոշ դասական վարքի շրջանակում:
Ամբողջատիրական համակարգերի համար շատ կարևոր է չուշանալ հասարակությանը շնորհավորելու հարցում, շնորհավորել մեկ առ մեկ, հատ հատ, շնորհավորել հնարավորինս ճոխ տեքստերով, մաղթանքներով: Իրավական պետություններում, որտեղ հիմնարար արժեքը քաղաքացիությունն է, ոչ թե «ջանսաղությունը», իշխանությունը չունի պարտաճանաչ շնորհավորանքների կարիք, քանի որ քաղաքացիները իշխանությանը չափում են բոլորովին այլ չափորոշիչներով: Քաղաքացիներն իշխանությունից սպասում են ոչ թե ջերմություն, այլ ծառայություն: Իշխանությանը նրանք վճարում են հենց դրա համար: Ջերմության համար քաղաքացիները կարող են վճարումներ կատարել շատ ավելի պրոֆեսիոնալ ծառայությունների: Իշխանությունից նրանք ոչ թե մաղթանքներ, այլ հաշվետվություններ են պահանջում՝ արած գործերի, մատուցած ծառայությունների, լուծած խնդիրների համար, պահանջում են բացատրություններ այն ամենի համար, ինչը չի արվել, չի լուծվել: Ու եթե իշխանական համակարգի և քաղաքացիների փոխհարաբերությունները կառուցված են այդ հիմքերի վրա, ապա իշխանության ներկայացուցիչները այլևս հարկ չեն համարում պարտաճանաչ կերպով շնորհավորել քաղաքացիներին որևէ տոնական առիթով: Լավագույն դեպքում, առավելագույնը, կարող են լինել նախագահական ուղերձներ, որոնք, սակայն, հիմնված են ոչ թե մաղթանքների, այլ արժեքային ուղենիշերի վրա:
Այդպես են զարգանում պետությունները և աճում հասարակությունները: Այնտեղ, որտեղ չկա թափանցիկություն, չկա հաշվետվողականություն, այնտեղ, որտեղ իշխանությունը դիտվում է ոչ թե ծառայող, այլ վերակացու, և որտեղ իշխանությունն ինքն էլ իրեն համարում է հենց այդպիսին, առաջանում են «դիմահարդարման» տարբեր պարագաների անհրաժեշտություններ: Շնորհավորանքները այս կամ այն տոնի առիթով, որ իրար հերթ չտալով հղում են պաշտոնյաները՝ նախագահից մինչև նախարար, ամբողջատիրական, քաղաքացիներին ոչ հաշվետու իշխող համակարգի դիմահարդարման պարագա են: Դրանք կոչված են իշխանության դեմքը փրկելու:
Իհարկե, Հայաստանի իշխանության դեմքը աղավաղված է այնպես, որ դիմահարդարման այդ պարագաներով այն փրկել չի հաջողվի, այդ դեմքին անհրաժեշտ է առնվազն պլաստիկ վիրահատություն:
